په افغانستان کې د ناټو په مشرۍ د غوڅ ملاتړ ماموریت وايي چې پرون په کابل کې د يوه افغان سرتېري په داخلي بريد کې دوو امريکايي سرتېرو ته مرګ ژوبله اوښتې ده.
د غوڅ ملاتړ ماموريت له لوري په خپره شوې خبرپاڼه کې ويل شوي چې ټپي شوی سرتېری په کابل کې د بګرام هوايي اډې روغتیايي مرکز ته لېږدول شوی او روغتیايي وضعیت یې د ډاډ وړ دی.
د غوڅ ملاتړ ماموریت په خبرپاڼه کې د لومړنیو معلوماتو پر بنسټ ویل شوي چې برید د افغان دفاعي او امنیتي ځواکونو د یو منسوب له خوا شوی دی.
په خبرپاڼه کې دغه راز ويل شوي چې بریدګر د افغان امنیتي ځواکونو د یو بل منسوب له خوا په ډزو سره وژل شوی دی.
په دې وروستیو اونیو کې دا پر بهرنيو ځواکونو د افغان سرتېرو دويم برید دی چې له امله یې بهرنیو ځواکونو ته مرګ ژوبله اوړي.
په افغانستان کې د ناټو د غوڅ ملاتړ ماموریت ویاند ډگروال کنټ پیټرز د لړم په څلورمه رسنيو ته ویلي وو چې روانو حالاتو ناټو دېته هڅولې چې د امریکایي او بهرنیو ځواکونو د امنیت په خاطر له افغان ځواکونو سره مخامخ لیدنې کتنې په موقتي ډول کمې کړي.
ناټو دا پرېکړه وروسته له هغې وکړه چې دوه اونۍ مخکې په يوه داخلي بريد کې د کندهار د امنيې قوماندان جنرال عبدالرازق په داسې حال کې ووژل شو چې د غوڅ ملاتړ عمومي قوماندان سکاټ مېلر هم ورسره و.
د ناټو ویاند پیټرز دا هم ویلي چې د ترهګرو پر ضد به خپلو عملياتو ته دوام ورکوي او له افغان ځواکونو سره به له لرې د ټليفون او ايمېل له لارې تماس ساتي.
د داخلي بریدونو اصطلاح هغو بريدونو ته کارول کېږي چې په عمومي توگه يې افغان سرتېري په پوځي اډو کې پر خپلو همکارانو او یا هم پر بهرنیو ځواکونو کوي.
له ٢٠٠٨ ز کال راهیسې په دغه ډول بریدونو کې څه د پاسه ١٥٠ امریکایي او یا هم د ایتلافي قواوو سرتېري وژل شوي او شاوخوا ٢٠٠ یې ټپیان شوي دي.
د دغو بریدونو کچه په ٢٠١٢ ز کال کې خورا لوړه وه چې هغه وخت یې د ائتلافي ځواکونو قوماندانان دېته اړ کړل، څو احتیاطي تدابیر ونیسي او په دې توګه له داخلي بريدونو د اوښتونکې مرګ ژوبلې کچه راټيټه کړي.
