د ټاکنو خپلواک کمېسيون د ولسي جرګې د ټاکنو ابتدايي پايلې پر ټاکلي وخت نه اعلانوي. بل پلو بيا شنونکي او کارپوهان د کمېسيونونو پر کمزوري مديريت نيوکه کوي او وايي چې ټاکنيز کمېسيونونه په اوسني ترکيب سره د ولسمشريزو ټاکنو د ترسره کولو جوګه نه دی.
د ټاکنو خپلواک کمېسيون اعلان کړی چې د ولايتونو د ټاکنو ابتدايي پايلې به په دوو اونيو ځنډ او د کابل د ټاکنو پايلې به بيا په دريو اونيو ځنډ سره اعلان کړي.
د ولسي جرګې د ټاکنو د مهالوېش پر بنسټ بايد د ټاکنو ابتدايي پايلې د لړم پر ۱۹مه نېټه اعلان شوې وای، خو د ټاکنو د خپلواک کمېسيون غړي او وياند سيدحفيظ الله هاشمي پرون خبري کنفرانس ته وويل چې د ۳۲ ولايتونو د ټاکنو پايلې به د ليندۍ په دويمه او د کابل د ټاکنو پايلې به بيا د ليندۍ پر ۱۰مه نېټه اعلان شي.
هاشمي وويل چې تر دې مهاله د ۲۳ ولايتونو د ټاکنو پايلې د کمېسيون مرکزي دفتر ته رسېدلې او د اتو هغو بيا د معلوماتو د ثبت مرکز ته د ننه شوې دي.
د ټاکنو د خپلواک کمېسيون غړي او وياند وويل چې د سياسي ګوندونو او جريانونو له لوري د ولسمشريزو ټاکنو د مهالوېش په تړاو مختلفې طرحې ورسپارل شوې چې په وينا يې اوس يې کمېسيونونه ارزونه کوي.
هاشمي وويل، د ارزونو تر بشپړېدو وروسته به د ولسمشريزو ټاکنو مهالوېش هم اعلان شي: «د وطن خير په دې کې دی چې ټولې ټاکنې په يو ځای وشي. وړانديزونه مختلف دي، دا چې د ولايتي شورا ټاکنې له ولسمشريزو ټاکنو سره يو ځای شي او که نه؛ کميسيون ارزونه کوي او ژر به اعلان شي».
په ورته وخت د سياسي ګوندونو ځينې استازي او د چارو شنونکي وايي، چې د ټاکنو خپلواک کمېسون د کمزوري مديريت تر اغېزې لاندې دی او که يې غړي بدل نه شي نو د ولسمشرۍ ټاکنې به له ګڼو ستونزو سره مخ شي.
د حزب اسلامي د مطبوعاتي ټیم غړي فیض الله ساپي مسير ورځپاڼې ته وويل چې اوسني کمېسيونونه د ولسمشريزو ټاکنو د مديريت وړتيا نه لري: «دوی د ولسي جرګې ټاکنې مسخره کړې او ونه توانېدل چې ښې ټاکنې وکړي. له همدې امله حزب اسلامي حاضر نه دی چې د دوی د کار دوام ومني او د دوی تر مشرۍ لاندې ولسمشریزې ټاکنې وشي».
ساپی وايي چې د کمېسیونو غړي باید استعفا ورکړي او پر ځای یې نوي کسان وګومارل شي.
د سیاسي چارو شنونکی فضل الرحمن عمرخېل بيا د ټاکنیزو کمېسيونونو غړي پر بې کفايتۍ او فساد تورنوي او وايي چې هغوی د ولسي جرګې د ټاکنو په سم ترسره کولو کې پاتې راغلل.
عمرخيل د اندېښنې په څرګندولو سره مسير ورځپاڼې ته وويل: «د دغو کمېشنرانو په مدیریت راتلونکې ولسمشریزې ټاکنې به هم له درغلیو او ستونزو ډکې وي».
عمرخېل وړاندیز کوي چې د ټاکنو قانون باید تعدیل شي او پراخ بدلونونه پکې راشي. د نوي قانون پر اساس باید نوي کمېشنران وټاکل شي او په کمېسيونونو کې دې ژورو اصلاحاتو ته زمينه برابره شي.
