واشنګټن ایکزماینر: امریکا باید په افغانستان کې خپله ماتې ومني

واشنګټن ایکزماینر امریکايي نشریه په یوه اوږده مقاله کې لیکي چې امریکا په افغانستان کې ما ته ده او دا تر ټولو ښه فرصت دی چې پر خپلو سیاستونو له سره کتنه وکړي. ددوی په خبره له ترهګرۍ، نشه يي توکو، فساد، کمزوري حکومتولی او دې ته ورته مواردو سره د مبارزې په برخه کې امریکا میلیاردونه ډالر ولګول خو پایلې یې نه دي لرلې. د نشریې په خبره په افغانستان کې د ملکي وګړو مرګ ژوبله لوړه شوې ده، د نشه يي توکو کاروبار ډېر شوی دی، ترهګر پیاوړي شوي دي، لا ډېرې سیمې د وسله والو لاس ته لوېدلې دي، د افغان پوځ په روزنه کې پراخې ستونزې شته دي، د بیا رغونې کارونه نه ترسترګو کېږي، د خلکو اقتصادي وضعیت کمزوری دی او په دې هېواد کې د راتلونکې لپاره د خلکو هیلې کمې شوې دي. واشنګټن ایکزماینر لیکي همدې مسایلو ته په کتو ویلی شو، چې امریکا په افغانستان کې ماته ده او باید خپله ماتې ومني. سرچینې ویلي امریکا دې پر خپلو سیاستونو، په تېره پر خپلو مالي لګښتونو په افغانستان کې له سره کتنه وکړي او په دې توګه دې د امریکایانو میلیاردونه ډالر مالیات بې ځایه نه لګوي.