د خبریالانو د مالي ملاتړ صندوق: حکومت هغه پیسې نه دي راکړې چې ژمنه یې کړې وه

د افغان خبریالانو د مالي ملاتړ صندوق مشر وایي، حکومت ورسره ژمنه شوې ۱۵ میلیونه افغانۍ مرسته نه ده ورکړې. د یاد صندوق رییس اصف وردګ، چې نن یې په کابل کې یوې ناستې ته خبرې کولې وویل، ټاکل شوې وه چې حکومت د خبریالانو د بیمې لپاره له دغه صندوق سره د ولسمشر غني له شخصي پانګې د ۱۵ میلیونه افغانیو مرسته وکړي، خو په خبره یې تر اوسه په دې برخه کې څه نه دي شوي. هغه زیاته کړې چې له یاد صندوق سره د کېدونکې مرستې د هرې افغانۍ ځواب به ورکوي. نوموړي له جزییاتو پرته وویل چې د دغه صندوق د ملاتړ لپاره ځینې لاسونه اوږده شوي وو، خو مخنیوی یې شوی دی. د اطلاعاتو او فرهنګ وزارت مرستیالې بیا یادې ناستې ته د خبرو پر مهال وویل، هڅه کوي، د کومې مالي مرستې ژمنه چې حکومت له دغه صندوق سره کړې، ترلاسه او د صندوق په حساب کې یې شامله کړي.