ولسمشر خپل د ملي امنیت سلاکار حمدالله محب او په پاکستان کې د افغانستان مخکیني سفیر حضرت عمر زاخېلوال ته د غازي وزیر محمداکبر خان دولتي مډالونه ورکړل. ولسمشرۍ ماڼۍ وايي: “دا مډالونه یې د هغوی د غوره او قدر وړ خدمتونو د تقدیرولو په موخه ورکړي دي”. څو ورځې وړاندې هم ولسمشر د کورنیو چارو او دفاع وزیرانو، د ملي امنیت رییس او د دوی په ګډون ۲۹ امنیتي مسوولینو ته هم لوړ دولتي مډالونه ورکړل.
اوس پوښتنه دا ده چې دغو کسانو څه کړي چې په مډالونو ونازول شي؟
لوړ دولتي مډالونه هغه کسانو ته ورکول کېږي چې کمساري، مهم او له نوښته ډک کارونه یې کړي وي، قربانۍ یې ورکړې وي او خلکو ته یې نه هېرېدونکي خدمتونه کړي وي. اوس حیرانوونکې دا ده چې ارګ داسې کسانو ته مډالونه ورکوي چې نه یوازې دا چې مهم او د یادولو وړ کارونه یې نه دي کړي، بلکې بر عکس یې دوی په خپلو کارونو کې ناکام دي. د دوی ناکامي د دې سبب شوې چې خلکو او حکومت ته لوی زیانونه واوړي. لومړی که موږ امنیتي چارې و ارزوو، نو ښکاري چې د دوی ناسمه رهبري، کمزوری مدیریت او ناوړه کړنې د نا امنۍ د زیاتېدو سبب شوې. ولسمشر هغو امنیتي مسوولینو ته مډالونه ورکوي چې د سیګار د رپوټ پر اساس ۱۲ سلنه نوره خاوره هم ترې وسله والو طالبانو لاندې کړې ده. هغو مسوولینو ته مډال ورکوي چې د دوی د ناسم مدیریت له امله هره ورځ زموږ سرتېري قرباني کېږي، ملکي وګړي وژل کېږي، وسله وال پر مختګ کوي، جنايي پېښې زیاتې شوې او هېڅ مثبت بدلون نشته چې دوی یې دې خلکو ته یاد کړي. اوس د دې پر ځای چې دا خلک له دندو ګوښه شي، حساب ورسره وشي او محاکمه شي؛ مډال ورکول کېږي.
ولسمشر اوس مډالونه په سیاسي رشوت کې هم ورکوي. حضرت عمر زاخېلوال ته له دې امله مډال ورکول کېږي چې هغه په راتلونکو ټاکنو کې ولسمشر ته ډېر مهم دی. که څه هم ویل کېږي چې هغه له حنیف اتمر سره هوکړه کړې، خو ولسمشر د نورو وړاندیزونو ترڅنګ هغه ته مډال هم ورکړ چې د حنیف اتمر څنګ پرېږدي او یو ځل بیا د ده لپاره کمپاین وکړي، خو داسې نه ښکاري چې زاخېلوال به خپله لاره بدله کړي. حمدالله محب چې لا یې کار معلوم نه دی، هم پر مډال نازول کېږي چې ولسمشر ته لا زیات کارونه وکړي. په دې ډول مډالونه هم د سیاسي معاملو لپاره کارول کېږي.
دا مډالونه ساده مډالونه هم نه دي، دا مډالونه د هغه چا په نوم دي چې موږ پرې ویاړو. زموږ د سترو غازیانو په نوم دي چې د نوم له اخیستو سره یې زموږ په رګونو کې ویاړ او هیبت غځوونې کوي. له بده مرغه د دغو ویاړلو اشخاصو په نوم اوس داسې کسانو ته مډالونه ورکول کېږي چې د دغو غازیانو د لارې پر خلاف ولاړ دي او د هغوی پر ارمانونو خاورې اړوي.
ولسمشر غني او په ټوله کې د ملي یووالي حکومت هر څه مسخره کړل. دا دی مډالونه یې هم مسخره کړل او اوس به نو مډالونه خپل هغه پخوانی ارزښت ونه لري. ان که څوک رښتینی مډال هم لري، نو خلک به یې د نورو په ډله کې حسابوي. ولسمشر ته پکار ده چې د سیاسي معاملو لپاره نوره دا ناوړه سوداګري بنده کړي، بلکې د رښتیني خدمت له لارې خلک خوښ وساتي او رایه ترې وغواړي.
