نړیوال بانک له افغانستان سره خپله ۲۰۰ میلیونه ډالره مرسته ځندولې ده

نړیوال بانک د افغانستان په مرکزي بانک کې د بې کفایتۍ له امله خپله دوه سوه میلیونه ډالره مرسته ځنډولې ده. د نړیوال بانک له لوري ولسمشر غني ته په یوه لیکل شوي لیک کې ویل شوي چې د افغانستان د مرکزي بانک له لوري د کلي اقتصاد په اړه له نړیوال بانک سره د معلوماتو نه شریکولو له امله خپله دوه سوه میلیونه ډالره مرسته ځنډوي. نړیوال بانک ویلي سره له دې چې په ځلونو یې له مرکزي بانک په دې برخه کې د همکارۍ غوښتنه کړې خو تر دې دمه دغه بانک مرسته نه ده ورسره کړې. په دغه لیک کې همدا راز راځي چې شل میلیونه ډالر نوره مرسته یې هم د عامه او خصوصي مشارکت په قانون کې د تعدیلاتو له امله ځنډولې ده. د سرچینې په خبره دغه پروژه له ماليې وزارت د ولسمشرۍ ماڼۍ د چارو ادارې ته لېږدول شوې ده چې نړیوال بانک په دې اړه د وضاحت غوښتونکی و. نړیوال بانک د روان کال لپاره له افغانستان سره د ۶۰۰ میلیونه ډالره مرستې ژمنه کړې وه چې له دې ډلې ۴۰۰ میلیونه یې ورکړې او تازه یې ۲۰۰ میلیونه مرسته ځنډولې ده. نړیوال بانک داسې مهال دغه پرېکړه کوي چې ولسمشر غني خپل یو نږدې کس اجمل احمدي چې په اړه یې په رسنیو کې لسګونه پوښتنې موجودې دي د مرکزي بانک رییس مقرر کړی دی او هغه هېچا ته د هېڅ شي په اړه معلومات نه ورکوي.