د مصالحې عالي شورا مشر ډاکټر عبدالله پرون ویلي وو چې د چهارشنبې په ورځ به په دوحه کې جدي بحثونه پیل شي. نوموړي ویلي وو چې دواړو لورو یو د بل نظرونه اورېدلي او سلا مشورې روانې دي. عبدالله زیاته کړې وه؛ ټول خلک تمه لري چې اوربند وشي، خو دا چاره وخت او حوصلې ته اړتیا لري. په دوحه کې د طالبانو او حکومت ټیمونو هغه موضوعات یو له بل سره شریک کړي، چې دوی غواړي په بین الافغاني خبرو کې پرې بحث وشي، خو نن به دواړه اړخونه پر دې بحث وکړي چې په اجنډا کې څه را شي او له څه او لومړی تمرکز پر کومو ټکو وشي.
په دوحه کې پر اجنډا بحثونه په داسې وخت پیلېږي چې دواړه لوري د خلکو او په ځانګړي ډول بهرنیانو تر ژور فشار لاندې دي، چې د سولې په چاره کې انعطاف وښيي، پرمختګ او جوړجاړی وکړي. دواړه لوري غواړي چې د خپلې خوښې موضوعات اجنډا ته داخل کړي، خو دواړه لوري داسې موضوعات هم یادوي چې موخه یې اجنډا ته داخلول نه دي، بلکې په مقابل لوري فشار دی چې غواړي پرې خپل اصلي موضوعات په اجنډا کې ومني. طالبان د پاتې بندیانو خوشې کول، د نظام ډول، اساسي قانون، د اوسني حکومت د برخلیک مسئله او ځینې نور مسایل اجنډا ته داخلول غواړي، خو حکومتي ټیم غواړي چې اوربند، د پاتې حکومتي بندیانو خوشې کول، د طالب جنګیالیو برخلیک، له طالبانو سره د بهرنیو جنګیالیو شتون او ځینې نور موضوعات په اجنډا کې راولي.
په دې چاره کې ځینې مسایل داسې دي چې سخته ده چې دواړه لوري یې دې یو له بل سره ومني. له همدې امله پر اجنډا بحثونه به هم لانجمن وي او هم به وخت واخلي. له بله اړخه تر اوسه پورې هم دا هڅه روانه ده چې د لانجمنو مسایلو په مطرح کولو او یا لانجمنو مسایلو ته په لومړیتوب ورکولو سره د سولې په پروسه کې خنډونه جوړ شي. تر اوسه پورې هم په ارادو او نیتونو کې ستونزې شته، نو ځکه به په قصدي او شعوري ډول د فضا د خرابولو او د خنډونو د جوړولو هڅه کېږي. له همدې کبله هغوی چې په رښتیا سوله غواړي او دې ته لوالتیا لري چې په دې پروسه کې خنډونه جوړ نه شي او ښه پرمختګ وکړي، نو ټول تمرکز یې باید پر دې وي چې هغه مسایل لومړیتوب ولري چې دواړه اړخونه غواړي په اجنډا کې وي او یا هم په اجنډا کې راوستل یې ډېر لانجمن نه وي. له همدې کبله پیل باید له هغو ټکو وشي چې په هغو کې ستونزې او اختلافات کم وي. له بله اړخه دواړه لوري باید درک کړي چې د ستونزې د حل لپاره پکار ده چې پر هر څه بحث وشي، نو ځکه باید ټول هغه مسایل اجنډا ته راشي چې په اړه یې اختلاف دی. که پر اختلافي مسایلو بحث ونه شي، اختلاف حل نه شي، نو ستونزې به همداسې پر ځای وي. له همدې امله دواړه اړخونه باید پر ټولو اختلافي مسایلو بحث ته تیار وي، حوصله وکړي، له ګډو او هغو ټکو پیل وکړي چې پرې کم اختلاف دی او بالاخره دواړه لوري باید ومني چې دوی له جوړجاړي او سولې پرته بله لاره نه لري او همدا لاره د خلکو اساسي غوښتنه هم ده.
