سامسُنګ کمپنۍ خپل تر ټولو ارزان بیه ګلکسي ځیرک موبایل معرفي کړ. دغه ځیرک موبایل ګلکسي اې۰۲ نومول شوی دی. دغه ځیرک موبایل به تر ټولو وړاندې ټایلینډ کې خرڅلاو ته وړاندې شي. ګلکسي اې۰۲ کې ۶٫۵ انچه اېچ ډي اېل سي ډي ډوله مخپاڼه ورکړل شوې ده. شاتنۍ برخه کې دوې کامرې لري چې ۱۳ مېګاپکسله اصلي کامره او ۲ مېګاپکسله مکرو کامرې هم پکې شاملې دي. مخکینۍ برخه کې یوه ۵ مېګاپکسله وړتیا لرونکې سېلفي کامره لري. دغه ځیرک موبایل کې د مېډیاټېک کمپنۍ اېم ټي۶۷۳۹ ډبلیو ډوله پروسېسر، ۳ ګېګابایټ رم او ۳۲ ګېګابایټ د فایل ثبتونې وړتیا ورکړل شوې چې له میموري کارت څخه هم ملاتړ کوي. ګلکسي اې۰۲ کې ۵۰۰۰ ملي امپیره پیاوړې بېټرۍ ورکړل شوې ده. د دغه ځیرک موبایل بیه ۲۹۹۹ ټایلینډي باټ (تقریباً ۸۰۰۰ افغانۍ) ټاکل شوې ده او ډېر ژر به نورو هېوادونو کې هم خرڅلاو ته وړاندې شي.
