مناسبې جامې اغوستل او مثبت اغېز یې

له دې انکار نه شي کېدای، چې د جامو اغوستلو بڼه زموږ په ژوند کې ډېر مهم رول لري او یا په بل عبارت؛ د جامو اغوستلو اغېز پر شخصیت باندې دومره ډېر دی، چې سترګې نه شي ور باندې پټېدای. دا په داسې حال کې ده چې په دې منځ کې یوه کوچنۍ پوله هم شته، چې ښکلې جامې بیا د انسانیت بېلګه نه شي کېدای، چې دغه څه بیا زموږ په کلتور کې ښه واضح شوي دي. خو له بله اړخه د جامو رنګ او بڼه بیا تر ډېره بریده زموږ د شخصیت ښکارندویي کوي.

کله چې له یوه چا سره د لومړي ځل لپاره وینو، هغوی زموږ د شخصیت په اړه په څه نه پوهېږي او په دې برخه کې معلومات نه لري، نو د دې لپاره چې پوه شي له موږ سره په کوم ډول خبرې او چلن وکړي، زموږ ظاهري بڼې ته په کتو خپلې خبرې او چلن تنظیموي. موږ خپله یو چې خلکو ته د دې موقع په لاس ور کوو، چې له موږ سره باید څنګه چلن وکړي. مهم ټکی دلته دا دی، چې موږ د جامو پر برنډ او ارزښت باندې خبرې نه کوو، اصلي خبره دلته د رنګ، موډل، پاکۍ، عطرو او زموږ د جامو ده. که موږ ډېرې ګرانه بیه او افتخاري جامې اغوستې وي، خو د اغوستو ځای یې مناسب نه وي او یا هم ډېرې خیرنې وي، بد بوی ترې ځي؛ نو هغه ده چې خلک به مو څنګ ته نه راځي او لرې به را څخه ګرځي. خو که مو ډېرې معمولي جامې اغوستې وي، له ځای او موقع سره برابرې وي، پاکې وي، نو زموږ په اړه د خلکو د تفکر په برخه کې ډېرې اغېزناکې پرېوځي.

د مناسبو جامو د ټاکلو لپاره او د دې لپاره چې پوه شو جامې زموږ پر شخصیت څومره اغېز ښیندلی شي؛ په یو وخت باید څو ټکي په پام کې ونیسو. د بېلګې په توګه، زموږ په هېواد کې دیني مسایل، کلتوري مسایل، قومي، ټولنیز، جنسیتي مسایل، اب هوا او نور ټول باید په یو وخت په پام کې ونیول شي. تاسو د یوه نارینه او یا یوې ښځینه په توګه د عمر او دندې په پړاوونو کې له بېلابېلو ټاکنو سره مخ یاست، چې هر یو یې پر خپل ځای خپل اغېز لري او ستاسو ټولنیز شخصیت تر اغېز لاندې را وستلای شي. د هر چا جامې د خلکو په نظر د هغه شخصیت ښکارندویي کوي، نو کولای شم ووایم، د ځانګړو جامو په اغوستلو سره تاسو نورو خلکو ته د خپل شخصیت په اړه معلومات په واک کې ورکوی.

هغه کسان چې غواړي په عمومي اذهانو کې د یوه بریالي کس په توګه را څرګند او وپېژندل شي، نو دغو ټکو ته باید پام وکړي:

۱. له کچې زیاتو زېوراتو څخه باید استفاده ونه شي. د بېلګې په توګه، بریالۍ مېرمنې د رسمي چارو پر مهال هېڅکله هم محلي زېوارت نه اچوي او لویې ګوتمۍ نه په ګوتو کوي.

۲. د یادښت کتابچې نوي والي ته مو پاملرنه وکړئ. که مو د یادښت د کتابچې پوښ زوړ شوی وي، خوړین شوی وي، رنګ یې الوتی وي او په لاس کې یې در سره ګرځوی، نو دا داسې ده لکه له یوې لوکسې درېشۍ سره چې چپلکې په پښو کړئ.

۳. دا به ډېره ښه وي چې د کمربند، بوټونو، د ګړۍ د بند او لاسي بکس د رنګونو تر منځ مو همغږي موجوده وي.

۴. غوره به دا وي چې د ژمي بوټ په ژمي او د اوړي بیا په اوړي کې په پښو کړل شي. ځانګړې ځنځیر لرونکي بوټونه او موزې تر ډېره د مني په اخر او ژمي کې اغوستل کېږي، نو هڅه وکړئ چې په پسرلي او اوړي کې یې په پښو نه کړئ.

۵. د نارینه او ښځینه دواړو لپاره په رسمي محفلونو کې د لویو ګوتمویو په ګوتو کول نه وړاندیز کېږي او زېب نه ور سره کوي.

۶. ښه دا ده چې د رنګونو تر منځ د همغږۍ په برخه کې پوره دقت وشي. ځینې وخت وینئ چې د جامو یو ډول رنګ له یوه چا سره  ډېر ښه برېښي، خو کېدای شي ستاسو د پوستکي د رنګ د روڼوالي یا پیکه والي، وزن د زیاتوالي یا کموالي او یا هم دا چې ستاسو ونه ټیټه ده ښه در سره ونه برېښي. نو ښه ده چې له خپل قدو قامت او څېرې سره یو همغږی رنګ معلوم کړئ او ویې کاروئ. دغه راز که مو د ګوتمۍ او چلې رنګ د ګړۍ، له رنګ سره سر وخوري، نو دومره به ښایسته ښکاره شي چې پوښتنه یې مه کوه.

۷. ځینې کسان د نکټایۍ په تړلو کې افراط او تفریط کوي. د نکټایۍ د تړلو تر ټولو غوره اندازه دا ده چې د کمر بند د ګل تر بېخ پورې مو را ورسېږي.

۸. په یخه هوا کې معمولاً د بالا پوش او جمپر وړاندیز کېږي، خو یو څه مو باید په یاد وي، چې له بالا پوش سره کېناستل، بیا په رسمي ناستو کې د جامو له تشریفاتو سره په ټکر کې عمل دی. همدا چې تړلې ساحې ته ننوتئ، بالا پوش باید و ایستل شي او مناسب ځای کې ځوړند کړل شي.

۹. په ښار او بازار کې د بوټونو بېلابېل ډولونه شته، چې د بېلابېلو جامو لپاره طراحي شوي دي. د بېلګې په توګه، دا نه شي کېدای چې تاسو له نکټایۍ او درېشۍ سره د سپورت بوټونه په پښو کړی او یا هم د دې برعکس. د نارینه‌وو لپاره تر ټولو غوره رسمي بوټان اکسفورډ یانې هماغه بند لرونکي کلاسیک بوټونه دي، چې تر ښنګرو پورې لوړوالی لري. اکسفورډ بوټونه بیا په خپل ذات کې دوه بېلې بڼې لري، توپیر یې یوازې د بوټ پر مخ د بندونو په تړلو کې دی. کلاسیک او اصلي یې اکسفورډ بالورال (Oxford Balmoral) نومېږي چې ډېر رسمي دي او ټولو نارینه‌وو ته پکار ده چې له دې بوټونو باید یوه یوه جوړه ولري. د دې بوټونو ښېګڼه دا ده چې هېڅکله له موډ نه لوېږي او بله دا چې له درېشۍ سره ښه سرخوري.

۱۰. د نښان، مډال او یا د هېواد د بیرغ ټومبلو ځای په کرتۍ کې معلوم دی. د هرې کورتۍ د یخن په کیڼه خوا کې دقیق د زړه پر سر یو کاج لیدل کېږي، چې د نښان، مډال او یا د هېواد د بیرغ ټومبلو لپاره ځانګړی شوی دی. معمولاً ځینې کسان له دې کاج لاندې یاد نښانونه ټومبي.

لکه څرنګه چې پاس یادونه وشوه، منظمې جامې اغوستل، زموږ د بریا په برخه کې مهم رول لوبوي، نو هېڅکله هم په کمه سترګه مه ورته ګورئ.