کاوون د لوړو زده کړو موسسه چې په مزارشریف ښار کې موقعیت لري، د بنسټ ډبره یې په ۱۳۹۳ کال کې د دوو پر هېواد مینو افغانانو لخوا کېښودل شوې او د ۱۳۹۴ کال په ثور میاشت کې یې پر فعالیت پیل وکړ. د کاوون د لوړو زده کړو موسسې د مالي او اداري معاون نثار احمد مبارز په وینا، کاوون د لوړو زده کړو موسسه له پیله تر اوسه درې پوهنځي (حقوق او سیاسي علوم، اقتصاد او عالي قابلګي) لري. د ښاغلي مبارز په وینا، کاوون د لوړو زده کړو موسسه په شمال زون کې یوازینی هغه خصوصي پوهنتون دی، چې د عالي قابلګۍ پوهنځی یې د لوړو زده کړو وزارت په چوکاټ کې د لسانس په کچه فارغین ورکوي او دا د دوی لپاره د ویاړ ځای دی.
مبارز زیاتوي، کاوون د لوړو زده کړو موسسه په خپلو دریو پوهنځیو کې پنځه ډېپارټمنټونه لري. د حقوقو او سیاسي علومو پوهنځی یې د قضا او څارنوالۍ او ادارې او ډيپلوماسۍ، اقتصاد پوهنځی یې د ادارې او تجارت او مالي- بانکي او عالي قابلګي پوهنځی یې یو عمومي ډېپارټمنټ لري چې درسي چارې یې د عالي قابلګۍ د یوه عمومي ډېپارټمنټ په چوکاټ کې پر مخ وړل کېږي او ښځینه محصلینې پکې پر زده کړو بوختې دي.
ښاغلی نثار احمد مبارز زیاتوي چې کاوون د لوړو زده کړو موسسې په پیل کې له ۸۰ تر ۱۰۰ پورې محصلین درلودل، چې د وخت په تېرېدو یې شمېر زیات شو او اوسمهال یاده موسسه له ۹۰۰ څخه تر ۱۰۰۰ پورې فعال محصلین لري چې په دې ډله کې شاوخوا ۵۵ سلنه ښځینه محصلینې او پاتې ۴۵ سلنه نور یې هلکان جوړوي، چې د کاوون د لوړو زده کړو په موسسه کې پر لوړو زده کړو بوخت دي.
ښاغلي مبارز همدا راز وویل، دوی تر دې دمه په ۱۳۹۷ او ۱۳۹۸ کلونو کې له خپلو دریو پوهنځیو څخه په دوو دورو کې ۲۸۰ محصلین فارغ او ټولنې ته یې د خدمت په موخه وړاندې کړي دي.
د کاوون د لوړو زده کړو موسسې یاد مسوول په خپلو خبرو کې وویل، دوی هر کال خپلو دریو پوهنځیو ته په مختلفه کچه نوي محصلین جذبوي چې که څه هم شمېره یې په دقیق ډول مالومه نه ده، خو کاوون د لوړو زده کړو موسسه په کلني ډول له ۲۵۰ څخه تر ۴۰۰ پورې نوي محصلین جذبوي.
د ښاغلي مبارز په خبره، کاوون د لوړو زده کړو موسسه خپلو محصلینو ته ځانګړی تخفیف وړاندې کوي. د نوموړي په وینا، دوی د موسسې لخوا د ټاکلي تخفیف سربېره، له ډېرو دولتي او غیر دولتي بنسټونو لکه د بلخ د ښځو چارو ریاست، د شهیدانو او معلولینو چارو ریاست، د بلخ د ځوانانو امریت، څارنوالۍ، محکمو، امنیه قوماندانۍ، شاهین قول اردو او داسې نورو سره د دوه اړخیزې همکارۍ تفاهم لیکونه لري، چې پر اساس یې کاوون د لوړو زده کړو موسسې ته د کمزوري اقتصاد لرونکي محصلین او ځوانان ورپېژندل کېږي، څو په لږ لګښت سره وکولای شي چې خپلو لوړو زده کړو ته دوام ورکړي او دوی یې هم په ځانګړي تخفیف سره د لوړو زده کړو لپاره جذبوي.
ښاغلي مبارز زیاته کړه، کاوون د لوړو زده کړو موسسه په دریو ټایمونو کې خپلې درسي چارې پر مخ بیایي، داسې چې عالي قابلګي پوهنځی یې د سهار او له غرمې وروسته دورو کې خپلې درسي چارې پر مخ بیایي او پاتې دوه پوهنځي یې په سهارنۍ او ماښامنۍ دورو کې درسي ټایمونه لري او محصلین یې په همدې دوو دورو کې خپلو زده کړو ته حاضرېږي.
ښاغلي مبارز وویل، لکه څرنګه چې کتابتون د یوه اکاډمیک مرکز او پوهنتون لپاره یو لازمي شرط دی، نو پر همدې اساس دوی د کاوون په لوړو زده کړو موسسه کې مجهز کتابتون لري، چې تر ۵۰۰۰ جلده پورې کتابونه لري. پر دې سربېره، د کاوون د لوړو زده کړو موسسې له نوښت سره سم دوی د خپلو محصلینو لپاره انلاین کتابتون هم لري، چې تر ۳۵ زره جلده پورې برېښنایي کتابونه پکې دي او محصلین کولای شي خپل د اړتیا وړ مالومات ترې تر لاسه کړي.
د کاوون د لوړو زده کړو موسسې د مالي او ادارې معاون په خبره، دوی په مزارشریف ښار کې له ډېرو علمي او اکاډمیکو مرکزونو سره نېکې او علمي اړیکې لري. پر دې سربېره، له هېواده د باندې د جرمني له وېتن پوهنتون سره د خپلو علمي کدرونو د ظرفیت د ارتقاع په برخه کې تفاهم لیکونه لري او همدارنګه د استانبول ښار له پوهنتون سره یې خبرې اترې روانې دي، چې په نږدې راتلونکي کې به د علمي اړیکو د ټینګښت په برخه کې تفاهم لیک لاسلیک کړي.
ښاغلي مبارز زیاته کړه، دا چې فارغو محصلینو ته د ډيپلوم توضیح او ورکړه د لوړو زده کړو وزارت د کاري لړۍ د ځنډ په موخه یو څه وخت نیسي، نو کاوون د لوړو زده کړو موسسې تر دې دمه د خپلو دواړو دورو فارغو محصلینو ته په انګلیسي او دري ژبو ترانسکرېپټونه او سرټېفېکټونه ورکړي دي، څو له حقوقو او امتیازاتو یې ګټه واخلي.
ښاغلي نثار احمد مبارز زیاته کړه، کاوون د لوړو زده کړو موسسه د خپلو محصلینو د علمي سویې د لوړاوي په موخه ډېر امکانات لکه له ځینو بهرنیو علمي او اکاډمیکو مرکزونو سره د قراردادونو او تفاهم لیکونو درلودل چې پر بنسټ یې د کاوون له لوړو زده کړو موسسې سره مالي مرستې کوي، حقوقي کلینیکونه یا د حقوقو او سیاسي علومو پوهنځي لپاره د عملي زده کړو پروګرامونه جوړول او همدارنګه د قابلګۍ څانګې لپاره د عملي زده کړو امکانات برابروي او محصلینو ته یې لازمې لارښوونې ورکوي او د اقتصاد پوهنځي په برخه کې هم د محصلینو لپاره ځینې د ارزښت وړ کمپیوټري پروګرامونه لکه ICP او داسې نور هم لري، چې د پوهنځي او درسونو اړوند زده کړې پکې پر مخ بیایي.
ښاغلي مبارز همدا راز زیاته کړه، طبیعي ده چې هر علمي بنسټ او اداره د یوې ټاکلې موخې او پلان پر اساس مخ پر وړاندې ځي، کاوون د لوړو زده کړو موسسه هم د لا بډاینې او پرمختګ په موخه ځینې پلانونه لري، چې له هغې ډلې د ظرفیت لوړونې پروګرامونو ته اشاره کولای شو. نوموړي زیاته کړه، له نېکه مرغه چې څو ورځې وړاندې د کاوون د لوړو زده کړو موسسې اداري هیئت او تقنیني کمېټې خپل راتلونکی پنځه کلن ستراتېژیک پلان جوړ کړ، چې په ترڅ کې به یې ځینو لویو پروګرامونو لکه له ګاونډیو هېوادونو سره متقابلو اړیکو ټینګولو، د قابلګۍ د برخې لپاره د یوه پرمختللي او مجهز کدري روغتون جوړولو، د کتابتون او لابراتوار د پرمختګ لپاره د منظمو پلانونو درلودلو او د لا ډېرو اسانتیاوو رامنځته کولو ته پوره پاملرنه وشي.
د کاوون د لوړو زده کړو موسسې د مالي او اداري چارو امر نثار احمد مبارز په خپلو خبرو کې وویل، دوی له دولت او په ځانګړې توګه له لوړو زده کړو وزارت څخه غواړي چې د خصوصي پوهنتونونو او د لوړو زده کړو موسسو په برخه کې دې د خپلو پروګرامونو لا ښه والي ته پام وکړي، د بهرنیو هېوادونو په تحصیلي بورسیو کې دې انډول په پام کې ونیسي او په ټوله کې دې خصوصي سکټور ته لا ډېره پاملرنه او مالي ملاتړ یې دې وکړي، څو د هېواد د علمي برخې او اکاډمیکو مرکزونو کیفیت لا لوړ شي او افغان وګړي وکولای شي چې په هېواد کې لا ډېرې پانګونې ته زړه ښه کړي او علمي او اکاډمیک مرکزونه پر خپلو پښو ودرېږي.
