«بریالی فکر او عمل» د سټیوهاروې کتاب دی، چې تازه پښتو ته ډېوې وردګ ژباړلی او همدا پښتو بڼه یې په ۱۶۶ مخونو کې راټوله شوې ده. د کتاب لومړۍ برخه په دې اړه ده چې په اوسنیو شرایطو کې څنګه واقعبین اوسېدای شو. باید له ځان سره په قاطع توګه رښتیني و اوسو، څو خپله وېره او محدودیتونه له ځان لرې وغورځوو، له مخې مو خنډونه لرې او له ژوند څخه پوره خوند واخلو.
دویمه برخه ستاسو مرستې ته را دانګي، څو خپلې وړتیاوې او استعدادونه مو وپېژنی. کله مو چې خپلې وړتیاوې او استعدادونه وپېژندل؛ نو له دغو وړتیاوو سره سم تاسو ته مناسب وسایل وړاندې کوي، څو په ژوند کې کار ترې واخلی او خپل ژوند مو بدل کړی. دا بیا هغه وخت دی چې تاسو هماغه کار چې مینه ورسره لری او خوند درکوي، تر سره یې کړئ. کله چې په خوښۍ او مینه کار وکړی؛ نو همدلته ده چې ستاسو په ژوند کې مثبت بدلونونه رامنځ ته کېږي.
لومړنی بدلون ستاسو په داخل کې تر سره کېږي. تاسو له ځانه وړانګې خپروی، چې د یوه مقناطیس په څېر نور بریالي او روڼ اندي کسان ستاسو خوا ته را جذبوي. تاسو د یوه بریالي تفکر قلمرو ته دننه کېږی.
وروسته له دې چې ستاسو وړتیاوې او استعدادونه په یوه مناسب مرکب سره سمبال شي، باید په خپل تخصصي جوړښت ګوتې ووهئ، منظم او جوړ یې کړئ، څو ښې لاسته راوړنې ولری.
درېیمه برخه د وړتیاوو د زیاتولو ځینې لارې او طریقې وړاندې کوي. په دغه څپرکي کې ستاسو د وړتیاوو او مهارتونو د ودې او تقویې لپاره مهم او ارزښتمن توکي او معلومات وړاندې شوي دي. په دغو معلوماتو کې د موخې د ټاکلو او همدارنګه ستاسو له وړتیاوو سره د موخې د اړیکې او تړاو په اړه ځينې سپارښتنې شاملې دي. دا علمي سپارښتنې په اصل کې هغه څه دي، چې ډېر ژر یې په خپل ژوند کې عملي او تر سره کولای شی. ښايي د وړتیاوو پېژندل او په اړه یې لاس پکارېدل، سملاسي ستاسو ژوند بدل نه کړي؛ خو لږترلږه ستاسو دغو ړتیاوو ته مانا او مفهوم وربښلای شي.
د کتاب لیکوال وايي: یو ځل بیا یادونه کوم، که دا قدرت او جرئت پيدا کړی چې خپلې کړنې صادقانه او بې زړه سویه و ارزوی؛ نو پوه شی چې د بریالیتوب اصلي کیلي مو پیدا کړې ده. دا برخه د وخت د ارزښت په اړه غږېږي. په دغه برخه کې به د ځینو موضوعاتو؛ لکه: د «نه» ویلو قدرت، د «نه» اورېدلو قدرت، د غوښتلو د جرئت او شک ختمولو په اړه تاسې ته اغېزمنې لارې وښیي. همدارنګه پر دې موضوع به هم وغږېږو، چې دا اړینه نه ده، هرڅوک چې دې څنګ ته راځي، درسره پاتې دې هم شي او ان تر مقصده دې درسره وي.
«د بریالي فکر او عمل» کتاب په انګېزه بښونکو خبرو پای ته رسېږي، څو تاسو راوپاروي چې خپله پوهه او وړتیاوې له نورو سره شریکې کړی. دا برخه پر دریو اړینو موضوعاتو ولاړه ده: د ځان پرمختګ او له بریالیو کسانو څخه د کرکې حس له منځه وړل، له یوه متوازن ژوند څخه د برخمن کېدو اساسي ټکي موندل او درېیم دا چې نورو ته اجازه ورکړو، څو زموږ له وړتیاوو ګټه واخلي.
د لیکوال په خبره، دا کتاب مې د دې لپاره نه دی لیکلی چې ویې لولی، په یوه ګوښه کې یې کېږدی او هېر یې کړی. اړینه دا ده چې سملاسي لاس پکار شئ. په دغه کتاب کې مې ځینې تمرینونه هم را اخیستي، څو د هغو پر اساس خپل افکار، هڅه او الهامونه ولیکئ. تاسو به د لیکلو د تمرین په وسیله د خپل بریالیتوب علمي نقشه انځور کړئ، چې دا وخت بیا کولای شی لکه څرنګه چې د خپلو وړتیاوو او استعدادونو رمزونه پرانیزی، همداسې پر دغه نقشې هم تکیه وکړئ او له همدې نقشې څخه په استفادې پرمخ ولاړ شی.
مینه وال کولای شي یاد کتاب پر اکسوس سربېره، د ښار له نورو لویو کتابپلورنځیو هم په مناسب قېمت تر لاسه کړي.
