د چين په مرسته؛ جوړه شوې تدريسي ودانۍ کابل پوهنتون ته سپارل شوې

په کابل پوهنتون کې د چین په مالي مرسته جوړه شوې تدریسي ودانۍ او تالار ګټې اخیستنې ته سپارل شوي دي. په کابل کې د چین سفیر وانګ یو نن په همدې مناسبت جوړو شویو مراسمو ته په وینا کې ویلي چې چين له اوږدې مودې راهيسې له افغانستان سره د زېربناوو د جوړولو برخه کې مرسته کړې او کوي یې. نوموړي دغه راز زیاته کړې چې هېواد به یې له افغانستان سره د کرونا پر وړاندې مبارزې او د سولې پروسې بشپړ ملاتړ ته هم دوام ورکړي. د یادونې ده چې چین د افغانستان په بیا رغونه کې پام وړ مرسته کړې ده چې د کابل پوهنتون د کنفوسيوس پوهنځي تدريسي ودانۍ، د افغانستان د تخنيکي او مسلکي زده کړو ملي انسټيټيوټ، په کابل کې جمهوريت روغتون او په کندهار کې ميروېس روغتون يې ژوندۍ بېلګې دي.