د افغانستان په صادراتو کې په تېرو درېیو میاشتو کې ډېروالی راغلی دی. د افغانستان د سوداګرۍ او صنایعو خونې مسوولین وايي چې روان کال افغانستان تر دې دمه د ۹۰۰ میلیونو ډالرو په ارزښت صادرات لرل چې د تېر کال په پرتله ډېروالی ښيي.
ددغه خونو مرستیال یونس مهمند وايي تېر کال افغانستان د ۷۲۲ میلیونو ډالرو په ارزښت صادرات لرل چې روان کال دا کچه شاوخوا ۹۰۰ میلیونه ډالرو ته رسېدلې ده. نوموړی وایي چې دمګړی د سپین بولدک، تورخم، غلام خان بندر او ډنډ پټان لارې د افغان صادراتو پر مخ پرانیستې دي او سوداګر خپل توکي بهر ته صادروي.
هغه زیاتوي چې په روان کال کې په وروستیو درېیو میاشتو کې د صادراتو کچه لوړه شوې ده او د لا ډېرېدو تمه کېږي.
