په هلمند کې په یوه هوايي برید کې دېرش ښځې، ماشومان او نور بې ګناه وګړي ووژل شول. لا دا غم سوړ نه و چې په لوګر کې ګډو ځواکونو ملکي وګړي له کورونو را و ایستل او ویې وژل. ورپسې یې په پکتیکا کې عملیات وکړل او بې ګناه وګړي یې شهیدان کړل. په پکتیکا کې لاریونونه وشول، خو ګډو ځواکونو خپل وحشت ته دوام ورکړ او وړمه شپه یې بیا په غزني کې درې او د پکتیا په زرمت کې ۱۲ بې ګناه کلیوال چې ماشومان هم پکې وو، په نیمه شپه په خپلو کورونو کې ووژل.
دا په یوه اونۍ کې په هوايي بریدونو او د ګډو ځواکونو په عملیاتو کې د ملکي مرګ ژوبلې معلومې پېښې او شمېرې دي. ښايي ځینې نامعلومې پېښې هم وي، خو پوښتنه دا ده چې ولې؟ ولې په قصدي او شعوري ډول ملکي وګړي په نښه کېږي؟ ولې دلته د افغان انسان ژوند ارزښت نه لري؟ ولې څوک د دغو جنایتونو پوښتنه نه کوي؟ ولې ارګ او نور چارواکي غلي دي او بالاخره ولې د دغو وحشتونو مخه نه نیول کېږي؟
اوس داسې نه ښکاري چې د ملکي وګړو ډېری وژنې به تېروتنه او یا ناسم معلومات وي. ډېری پېښې داسې دي چې قصدي وژنې ورته ویلی شو. کله چې په لوګر کې ملکي وګړي له کورونو را ایستل کېږي او بیا ویشتل کېږي، په دې کې نو هېڅ تېروتنه نشته او کله چې په زرمت کې خلک لومړی نیول کېږي او بیا وژل کېږي، په دې کې نو تېروتنه نشته. که موږ وروستۍ پېښې وګورو، ټولې همداسې دي. په دغو وژنو کې د ښکېلو ځواکونو په اړه هم جدي پوښتنې شته. په خوست کې کمپاین ځواکونه او په کابل کې صفر یو قطعه په دغو عملیاتو کې دخیل دي چې امریکايي ځواکونه هم ورسره وي. داسې ښکاري چې دا وژنې مخامخ د امریکايانو په امر کېږي، ځکه چې په دغو عملیاتو کې ښکېل ځواکونه مخامخ د امریکایانو تر قوماندې لاندې دي.
حکومت به پخوا کله کله داسې بریدونه یا توجیه کول او یا به یې هم تحریفول. اوس غلی دی او له ډېر فشار وروسته د څېړنو خبره وکړي، خو ټول پوهېږي چې دا څېړنې بې مانا او د خلکو په سترګو کې د خاورو شیندل دي. له بده مرغه د ملي یووالي حکومت هم د ملکي وګړو په وژنه کې مخامخ ښکېل دی او هم د امریکایي ځواکونو له خوا د ملکي وګړو د وژنې په اړه غلی دی. دوی په دې ډول دریځ سره خلکو ته د پردیتوب احساس ورکوي، له مخالفینو سره مرسته کوي او غواړي دا جګړه او وحشت لا پسې وغځوي. د ملي یووالي حکومت مشران به پر دغو جنایتونو له دې امله هم غلي وي او یا به پکې مرسته کوي چې ټاکنې را روانې دي او دوی غواړي امریکایان خوشاله وساتي. ښايي نور لاملونه هم وي، خو هېڅ لامل د توجیه وړ نه دی او دا کار د ټولو ارزښتونو خلاف له افغان ولس سره دښمني ده.
حکومتي مشران دې پوه شي چې دا بریدونه بې ځوابه نه پاتې کېږي. دا ډول وحشتونه او جنایتونه به حکومت لا زیات کمزوری کړي او د ملي یووالي حکومت د مشرانو پر ضد به نفرت زیات شي. دا نفرت هغه لوري ته روان دی چې بیا به نه امریکا او نه هم بل څوک اوسني بلواکه مشران پر ولس وتپلی شي.
