ناټو به روانه اونۍ له افغانستان سره کړې ژمنې تازه کړي

د ناټو د بهرنیو چارو وزیران به د بلجیم په پلازمېنه بروکسل کې دا اونۍ د افغانستان په اړه خبرې وکړي. د جولای په میاشت کې د ناټو له سرمشریزې راهیسې، دا د ناټو د بهرنیو چارو وزیرانو او د دوی شریکانو چې په افغانستان کې پوځیان لري؛ لومړۍ غونډه ده. د یادې غونډې په درشل کې د ناټو د عمومي منشي مرستیال ویاند پیرز کرالي وویل، دا غونډه به د سه شنبې او چهارشنبې په ورځ ترسره شي او د ناټو غوڅ ملاتړ ماموریت د بهرنیو چارو وزیران به له افغانستان سره د ناټو ژمنې نوې کړي. هغه زیاته کړې، دا ناسته د دې لپاره جوړوي چې ناټو یو ځل بیا په افغانستان کې د غوڅ ملاتړ ماموریت په برخه کې پر خپلو ژمنو د تایید ټاپه ولګوي. تمه ده په یاده ناسته کې د افغانستان د بهرنیو چارو وزیر هم د یو لوړپوړي پلاوي په مشرۍ ګډون وکړي. دا غونډه په داسې حال کې رابلل شوې چې په دې وروستیو کې د امریکا له خوا د افغان جګړې پای ته رسولو هڅې ګړندۍ شوې دي.