انټي وار:  په افغانستان کې د امریکا د بریا څرک نه ښکاري

انټې وار نشریې په یوه اوږده مقاله کې په افغانستان کې روانې جګړې ته کتنه کړې ده. دغه نشریه لیکي په افغانستان کې په روانه جګړه کې د امریکا دبریا او د روانې خونړۍ جګړې د پای څرک نه ښکاري. سرچینه زیاتوي داسې ښکاري چې امریکا په افغانستان کې ماته شوې ده، ځکه هغه ژمنې یې تر دې دمه پوره کړې نه دي چې افغانستان ته د راتګ پر مهال یې کړې وې. انټي وار زیاتوي په افغانستان کې جګړې شدیدې شوې دي، طالبانو پر لا ډېرو سیمو کنټرول لري، د افغان ځواکونو تلفات لوړ شوي دي، هوايي بریدونه ډېر شوي نو ددې ټولو ترمنځ هېڅ داسې نښه نښانه نشته چې له هغه دې د افغان جګړې د پای ته رسېدو او د امریکا د بریا هیله واخیستل شي. نشریه همدا راز وایي چې امریکا په وروستیو کې د سولې هڅې پیل کړې دي، خو داسې نه ښکاري چې دا موخه به هم تر لاسه کړي، ځکه د افغان حکومت او طالبانو ترمنځ بنسټیز اختلافات موجود دي او امریکا دا وړتیا نه لري چې یاد اختلافات له منځه یوسي.