د سولې عالي شورا: ډېر ژر به له طالبانو سره مخامخ خبرې پيل شي

د سولې عالي شورا ویاند احسان طاهري له روسي خبري اژانس ریانوویستی سره په خبرو کې ویلي چې افغان حکومت پر طالبانو هېڅ راز مخکینی شرط نه ږدي. دده په خبره له طالبانو سره د بهرنیو ځواکونو د وتلو او اساسي قانون د تعدیل تر څنګ د ټولو مسایلو پر سر بحث ته تیار دي او ښایي ډېر ژر مخامخ خبرې پيل شي. د طاهري په وینا د سولې عالي شورا هڅه کوي له طالبانو سره د سولې خبرې ژر یوې پایلې ته ورسېږي او په دې برخه کې د هر هغه اقدام هر کلی کوي چې افغانان سولې ته نږدې کوي. نوموړي همدا راز ویلي چې افغان حکومت هم د سولې لپاره جدي دی، خو طالبانو ته په کار ده، چې د افغان حکومت، نړیوالې ټولنې، سیمې د هېوادونو او سولې عالي شورا هغه وړاندیزونو ته پام وکړي چې له مخې یې افغانستان ته سوله راتللی شي.