یوه پولنډي شرکت په افغانستان کې په بېلو برخو کې د پانګونې ژمنه کړې ده. د راپورونو له مخې د ایم آی ار په نامه د یوه پولنډي شرکت مشر ویلي چې افغانستان د پانګونې لپاره غوره فرصتونه لري او دوی تیار دي چې په دغه هېواد کې پر مهمو برخو پانګونه وکړي.
رادو سلاو وایي د دوی شرکت د کرنې، کانونو، کرنیزو محصولاتو د پروسس، درملو د تولید او ساختماني برخه کې فعالیتونه لري چې په دې ټولو برخو کې پانګونې ته تیار دي. هغه زیاته کړې چې افغانستان کې باید نړیوالو پانګه والو ته د پانګونې زمینه برابره شي څو دغه هېواد پر خپلو پښو ودرېږي.
تر دې وړاندې هم ګڼو نړیوالو پانګه والو او شرکتونو افغانستان کې پانګونې ته تیاری ښوودلی دی او د افغانستان نوي حکومت هم په ځلونو ویلي چې دوی د پانګونې لپاره تر ټولو امنه او مصونه فضا برابروي.
