د بشري حقونو کمیسیون: د افغانانو کلتوري، مذهبي او ټولنیزې ازادۍ محدودې شوې دي

د افغانستان د بشري حقونو خپلواک کمېسیون وايي، په تېرو دریو کلونو کې‌ په پرله پسې ډول په افغانستان کې د دغه هېواد د اوسېدونکو سیاسي کلتوري او ټولنیزې ازادۍ محدودې شوې دي. د دغه کمېسیون ویاند بلال صدیقي ویلي چې د ناامنیو پراخېدو، پر لاریونونو، مذهبي او ټولنیزو غونډو بریدونه د دغو ازادیو د محددېدو سبب شوي‌ دي. دده په خبره په افغانستان کې د بشري حقونو وضعیت خورا ترینګلی دی او د ملکي وګړو د مرګ ژوبلې شمېر په وروستیو میاشتو کې لوړ شوی دی. صدیقي ویلي د بشري حقونو خپلواک کمېسیون په روان کال کې له ښځو سره د تاوتریخوالي ۴زره پېښې هم ثبت کړې دي. په افغانستان کې د ملګرو ملتونو سیاسي نمایندګۍ یا یوناما بیا ویلي و، که څه هم په افغانستان کې د بشري حقونو په برخه کې پرمختګ شوی، خو لا هم ځنې ستونزې پر خپل ځای پاتې دي.