د سولې عالي شورا: قوي اجماع د روانې جګړې مشروعیت اخیستی

د سولې عالي شورا وايي چې د سولې لپاره ملي، سيمه ييزې او نړيوالې اجماع رامنځته کېدو سره په افغانستان کې د روانې جګړې مشروعيت تر پوښتنې لاندې راغلى دى. د سولې شورا د دارالانشاء رييس ډاکټر اکرم خپلواک دغه څرګندونې د سولې د نړيوالې ورځې په مناسبت په خپل يو پيغام کې کړې. خپلواک ويلي، ټول بايد د سولې لپاره رښتينې هلې ځلې وکړي، څو په هېواد کې ٤٠ کلنه جګړه پاى ته ورسېږي. نوموړي زياته کړه، په روان زېږديز کال کې دسولې عالي شورا ډېرې لاسته راوړنې درلودې او د سولې په برخه کې يې ملي، سيمه ييزه او نړيواله اجماع رامنځته کړې ده. د هغه په وينا، دغې اجماع په افغانستان کې د جګړې قانوني مشروعيت له سوال سره مخ کړى دى. خپلواک وايي، د سولې په اړه د افغانستان او د نړۍ د علماوو غږ له مهمو لاسته راوړنو څخه ګڼل کېږي.