ولسمشرۍ ماڼۍ وایي، یوازې مذاکره کوونکی پلاوی له طالبانو سره د مخامخ خبرو صلاحیت لري. د ولسمشر مرستیال ویاند عارف صمیم وویل چې د سولې مشورتي بورډ به له طالبانو سره د سولې د خبرو مسولیت نه، بلکې د سولې په بهیر کې د ملي یووالي حکومت مشرانو او مذاکره کوونکي پلاوي ته د سلا او مشورو واک ولري. هغه وویل یوازې د سولې لپاره ټاکل شوی پلاوی طالبانو سره د سولې خبرو واک لري. ولسمشر د چارو ادارې د مشر عبدالسلام رحیمي په مشرۍ د حکومتي چارواکو، والیانو، مرستیالانو او سیاسي څېرو په ګډون د سولې ۱۲ کسیز مذاکره کوونکی پلاوی ټاکلی دی. په ورته وخت کې پرون ولسمشر یو بل بورډ اعلان کړ چې پکې د هېواد نامتو سیاستوال او جهادي رهبران شامل دي. دا په داسې حال کې ده چې د افغان سولې لپاره د امریکا ځانګړي استازي زلمي خلیلزاد د سیمې هېوادونو ته د خپل دویم سفر پر مهال پر حکومت او طالبانو غږ کړی وو چې د سولې خبرو لپاره دې له خپلو اړخونو باصلاحیته پلاوی وټاکي.
