په دې وروستیو کې ګډ ځواکونه نږدې هره ورځ او شپه پر عامو خلکو بریدونه کوي. په کونړ او هلمند کې د ملکي وګړو د وژنې کیسه لا ګرمه ده، حکومت بیا تازه په هلمند کې د عامو خلکو دوکانونه سوځولي دي. وړمه شپه ګډو ځواکونو د هلمند د ګرمسیر ولسوالۍ آمر اغا بازار نږدې ټول دوکانونه سوځولي دي. حکومتي سرچینې دا پېښه تاییدوي او وايي چې دوی ځکه دا کار وکړ چې په دغو دوکانونو کې د تاریاکو پېر او پلور کېده او دوی یو مخ له منځه وړي دي.
لومړی خو د بازار په خپرو شوو تصویرونو کې ښکاري چې د حکومتي چارواکو ادعا دروغ ده، ځکه چې روښانه معلومېږي په دوکانونو کې نور شیان دي. دغه راز په ټولنیزو رسنیو کې د پېښې خپاره شوي تصویرونه او ویډیوګانې ښيي چې پر عام بازار برید شوی او دوکانونه سوځول شوي دي. دا سمه ده چې په دې بازار کې به د تاریاکو د پلور او پېر دوکانونه هم وو، خو له شک پرته چې دا عام بازار و او عام دوکانونه هم سوځول شوي دي. په هلمند کې تاریاک عامه مسئله ده او په نوي سلنه هلمند کې چې حکومت پکې نشته، خلک تاریاک کري او پلوري یې. اوس حکومت باید پر همدې نوي سلنه هلمند بمونه وغورځوي، دوکانونه او د خلکو کورونه وسوځوي!؟
په دې وروستیو کې د حکومت کړنې داسې دي چې له شک پرته له ولس سره دښمني ده او په دې سره وسله والو مخالفینو ته کمپاین روان دی. هره ورځ د ښځو، ماشومانو او نورو بې ګناه وګړو وژل له ولس سره له دښمنۍ پرته بله مانا نه لري. په دې سره خلک لازیات له حکومت څخه زړه توري کېږي، وسله والو مخالفینو ته پکې ځای پیدا کېږي، خلک اړ کېږي چې د غچ اخیستنې لپاره له وسله والو سره یو ځای شي. که حکومت رښتیا له ولس سره په جګړه کې نه وي او غواړي له وسله والو مخالفینو سره جګړه وکړي، نو بیا خو پکار ده چې ولس را خپل شي، ښه چلند ورسره وشي او مخالفین منزوي شي. اوس خو حکومت پر ولس بمونه غورځوي، خلک له دې امله وژني چې طالب یې کور ته ورغلی او یا یې هم د کور ترڅنګ تېر شوی دی. اوس ولس له دې امله وژل کېږي چې د طالب تر واکمنۍ لاندې ساحه کې ژوند کوي. په دې سره خو ولس لا زیات د مخالفینو خواخوږی کېږي او حکومت یې له سترګو لوېږي. له اوسنیو کړنو داسې ښکاري چې حکومت او امریکايي ملګري یې د وسله والو پر ځای له ولس سره په جګړه کې دي او هره ورځ ولس وژني.
حکومت ته پکار ده چې له خپله اړه هم دا جګړه ودروي او د امریکایانو مخه هم ونیسي. له دې پرته به دا حکومت ورځ تر بلې کمزوری شي، لا زیاته ځمکه به یې له کنټروله ووځي او بیا به د ولس د را خپلولو او د حکومت د ټینګولو لپاره ډېر ناوخته شوی وي.
