په متحده عربي اماراتو کې پرون یو ځل بیا د افغان سولې په تړاو خبرې وشوې. په دغه غونډه کې د طالبانو او خلیلزاد په مشرۍ د امریکايي پلاوي ترڅنګ د سعودي، متحده عربي اماراتو او پاکستان استازو هم برخه اخیستې وه. که څه هم طالبانو ویلي چې په غونډه کې یې د قطر دفتر غړو برخه اخیستې ده، خو ځینو سرچینو رویټرز ته ویلي چې د ملا عمر د زوی ملا یعقوب دوو استازو هم په غونډه کې برخه اخیستې ده. رویټرز دا هم ویلي چې غونډه به درې ورځې دوام کوي. په کابل کې چارواکي مني چې د دوی یو پلاوی هم متحده عربي اماراتو ته تللی دی. طالبانو بیا ویلي چې له دې پلاوي سره یې نه لیدلي او نه هم د لیدلو اراده لري.
په متحده عربي اماراتو کې د شوې غونډې جزیات نشته او معلومه نه ده چې په څه خبرې شوې دي. د افغانستان د سولې په چاره کې اوس ښکاره د دوو بلاکونو سیالي لیدل کېږي. د افغان سولې په برخه کې عربي هېوادونه، په ځانګړي ډول امارات او سعودي په امریکايي بلاک کې دي او ټوله هڅه یې دا ده چې پر طالبانو د فشار له لارې هغوی د امریکايي غوښتنو او اډو منلو ته اړ کړي. بلخوا روسیه، چین او ایران بیا غواړي چې افغان سوله د خپلو ګټو سره سمه را وڅرخوي او په افغانستان کې امریکايي حضور پیکه کړي. پاکستان بیا په منځ کې دی چې که له هر لوري ورته ډېر امتیاز ورکړل شي، همغه لوری به نیسي. عربي هېوادونه له یوه اړخه له امریکا سره د نږدې اړیکو پر اساس د سولې په چاره کې مرسته کوي او له بله اړخه غواړي د دې مرستې له لارې د هغه بلاک پر وړاندې یو څه وکړي چې ایران یې برخه دی.
د افغانستان د جګړې او سولې بحث امریکا خپل انحصار ګڼي او پاکستان یې پکې له سره ښکېل کړی و، خو اوس ایران، روسیه، چین او نور هېوادونه هم پکې ښکېل شوي دي. په دې خبرو کې ټول اړخونه د خپلو ګټو د خوندي کولو هڅه کوي. امریکا او سیمه ییز هېوادونه هم د خپلو ګټو د خوندي کولو لپاره هڅې کوي. په دې چاره کې هېر شوی لوری افغانستان دی. دا سمه ده چې طالبان د یو افغاني اړخ په توګه په دې خبرو کې برخه لري، خو هغوی بیا داسې مجبوریتونه لري چې د افغاني ګټو په خوندیتوب کې به بریالي نه شي. افغان حکومت څنګ ته شوی دی او ستر لامل یې هم دا دی چې دلته له چارواکو سره د افغان ګټو او ارزښتونو د خوندیتوب پر ځای د خپلو شخصي ګټو او واک د تدوام بحث دی. امریکا بیا بیا وايي چې دوی د افغان دولت په مالکیت او مشرۍ د سولې د خبرو ملاتړ کوي، خو په عمل کې بیا نه یوازې د افغانانو مشري نشته، بلکې حکومت منزوي شوی او ان په خبرو کې برخه هم نه ورکول کېږي. کله چې د افغانستان په تړاو خبرې کېږي او افغان دولت پکې نه وي، باید حکومت شدید اعتراض وکړي، خو حکومت نه غواړي امریکا خپه کړي. له همدې امله اوس د سولې په چاره کې سیمه او امریکا په سیالۍ بوخت دي او په دې سیالیو او چنو کې د افغاني ګټو او ارزښتونو د خوندیتوب لپاره څوک نشته.
