افغان حکومت یو ځل بیا نړیوالو مرستندویه بنسټونو ته د بشپړې همکارۍ ډاډ ورکړی دی. د بهرنیو چارو وزارت له لوري په خپره شوې اعلامیه کې راغلي چې د بهرنیو چارو سرپرست وزیر امیرخان متقي د خپل کار په دفتر کې د کډوالو د نړیوالې ادارې له مرستیالې اوګوچي ډینیلز سره کتلي دي.
په دې لیدنه کې دواړو لورو په افغانستان کې پر روان وضعیت او بشردوستانه مرستو خبرې کړې دي. اوګوچي له افغان لوري مننه کړې چې د دوی همکارانو ته یې د فعالیتونو مصونه فضار برابره کړې ده او د اسانتیاوو پر رامنځته کولو کې یې همکاري کړې ده.
متقي هم ویلي چې دوی له ملګرو ملتونو او نورو نړیوالو بنسټونو د بشردوستانه مرستو له امله مننه کوي او تمه لري چې دغه بنسټونه له اړمنو افغانانو سره مرستې پراخې کړي. متقي یو ځل بیا ډاډ ورکړی چې نړیوالو مرستندویه موسسو ته د کار او فعالیت امنه فضا مساعده ده او دوی کولی شي تر هر اړمن افغان پورې خپلې مرستې ورسوي.
