ولسي جرګې د سرپرستانو له خوا د ځینو ارګانونو پر اداره کولو نیوکه وکړه او له حکومته یې وغوښتل چې د یادو ادارو او سترې محکمې د دریو څوکیو لپاره د ولسي جرګې ته د باور رایې اخیستو لپاره نوماندان ور وپېژني.
همدا اوس د کانونو او پټرولیم، د بهرنیو چارو، د اطلاعاتو او کلتور، پوهنې، اوبو او انرژۍ، د ښار او کور جوړولو او ماليې وزارتونه او دغه راز د افغاني سرې میاشتې اداره د سرپرستانو له خوا اداره کېږي.
له یادو کسانو ځيني یې شاوخوا دوه کاله او یو شمېر نور بیا له څو میاشتو راهیسې په داسې حال کې د سرپرستانو په ډول کار کوي چې د سرپرستۍ د قانون له مخې هېڅوک نه شي کولای له دوو میاشتو ډېر د سرپرست په توګه کار وکړي.
د یادولو ده، د سترې محکمې د عالي شورا د دريو غړو کاري موده هم پای ته رسېدلې او پر ځای یې باید نور کسان ولسي جرګې ته د باور رایې اخیستو لپاره ور وپېژندل شي.
په ولسي جرګه کې د کندهار د خلکو استازي محمد نعیم لالي حمیدزي د یادې جرګې په پرونۍ ناسته کې وویل، د سرپرستانو د کار دوام د قانون خلاف دی او د هغو ادارو لپاره دې نوماندان د باور رایې اخیستو لپاره جرګې ته ور وپېژندل شي چې د سرپرستانو له خوا اداره کېږي.
د هغه په خبره، زیاتره کاندید وزیران له دې امله د ملت او په ملي شورا کې د خلکو د استازو لپاره هېڅ باور نه لري چې ځواب ورکوونکي نه دي او ډېری یې پر خپلو شخصي کارونو بوخت دي.
د ولسي جرګې رییس عبدالرووف ابراهیمي هم له حکومته وغوښتل چې د حکومت د قانوني کېدو لپاره دې ژر تر ژره جرګې ته د هغو وزارتونو لپاره کاندید وزیران ور وپېژني چې د سرپرستانو له خوا اداره کېږي.
نوموړي دغه راز له حکومته وغوښتل چې د افغاني سرې میاشتې ریاست او د سترې محکمې عالي شورا د دریو څوکیو لپاره دې کاندیدان یادې جرګې ته د باور رایې ترلاسه کولو لپاره وروپېژني.
هغه له جزئیاتو پرته وویل، دوه کاندید وزیران او د سترې محکمې دوه غړي مخکې د رسمي مکتوبونو له لارې ولسي جرګې ته ور پېژندل شوي دي.
