د پاکستان دفاع وزیر: د افغانستان خاوره د پاکستان پر ضد کارول کېږي

د پاکستان د دفاع وزیر خواجه محمد اصف یو ځل بیا ادعا کړې ده چې ترهګر د افغانستان خاوره د دوی پر ضد کاروي. نوموړي دا څرګندونې د خیبر پښتونخوا ایالت د پېښور ښار د پولیسو په یوه جومات کې تر بریده وروسته کړې دي. پرون د ماسپښین د لمانځه پر مهال د خیبرپښتونخوا ایالت دپېښور ښار د پولیسو د یوه مرکز په جومات کې ځانمرګی برید شوی و، چې له امله یې ۵۹ تنه مړه او تر ۱۵۰ زیات ټپیان شوي دي. د افغانستان د سرپرست حکومت د بهرنیو چارو وزارت او په اسلام اباد کې د افغانستان سفارت دغه برید په کلکه غندلی دی. د پاکستان د دفاع وزیر خواجه محمد اصف د پېښور چاودنې ته په اشارې سره ویلي چې د دوحې تړون له مخې د افغانستان خاوره باید د بل هېواد پر ضد ونه کارول شي. خو هغه جیو ټلویزیون سره په مرکه کې ویلي، داسې شواهد یې ترلاسه کړي چې د افغانستان خاوره د پاکستان پر ضد کارول کیږي او د پاکستان ثبات له منځه وړي. خواجه اصف ویلي چې کابل او اسلام اباد باید په ګډه دترهګرۍ پر ضد ګډ اقدامات وکړي. پاکستان تر دې مخکې هم دا ډول تورونه لګولي  خو د افغانستان حکومت رد کړي دي.