د چین ولسمشر له ویلادیمیر پوتین سره کتلي دي

د چین ولسمشر شي جین پېنګ روسیې ته د خپل درې ورځني رسمي سفر په لړ کې مسکو ته رسېدلی او له ولسمشر پوتین سره یې کتلي دي. شي جين پېنګ روسیې ته له رسېدو وروسته په لنډو څرګندونو کې روسیه د چین لپاره د باور وړ ملګری هېواد وباله. فرانس پرېس خبري اژانس دهغه له قوله لیکلي، ډاډه دی چې دا سفر به ګټور وي او د چین او روسیې ترمنځ اړیکې به پراختیا او تلپاتې والی لا چټک کړي. ټاکل شوې د چین ولسمشر به نن د روسیې له لومړي وزیر میخایل میشوستین سره وګوري. چین وايي د اوکراین په جګړه کې د کوم لوري پلوي نه کوي او هڅه کوي د دواړو خواوو ترمنځ د خبرو د اسانچاري رول ولوبوي. د دواړو هېوادونو د اړیکو پراختیا برخه کې هم دا سفر مهم بلل کیږي. تمه ده چې دواړه هېوادونه په بېلابېلو برخو کې څو مهم تړونونه لاسلیک کړي.