د افغانستان ۱۹ کلنو لوبډلې له سریلانکا د یو ورځنیو سیالیو لوبلړۍ وګټله

د افغانستان د نولس کلنو کرکټ لوبډلې سریلانکا ته په دوو یو ورځنیو لوبو کې ماتې ورکولو سره لوبلړۍ دوه پر صفر وګټله. دا لوبې په متحده عربي اماراتو کې ترسره شوې. د افغانستان او سریلانکا تر ۱۹کلنو د کم عمر لرونکو ملي لوبډلو تر منځ د دوو یو ورځنیو سیالیو د لوبلړۍ دویمې لوبې پچه افغان لوبډلې وګټله او لومړی یې د توپ اچونې پرېکړه وکړه. د سریلانکا لوبډلې د لوبې په ۳۷م اور کې خپل ټول لوبغاړي له لاسه ورکړل او د ۱۶۲ منډو هدف یې وټاکه. دافغانستان کرکټ بورډ وایي، د افغان ستورو په توپ اچونه کې فریدون داودزي او کامران هوتک هر یوه ۳، یما عرب ۲، خلیل احمد او محمد هارون خان هر یوه یو-یو لوبغاړی د لوبې له ډګره بهر کړل. د سریلانکا لخوا ټاکل شوی هدف افغان ستورو د لوبې په ۳۳م اور کې یوازې د ۴ لوبغاړو په زیان ترلاسه کړ او د ۶ ویکټو په توپیر یې بریا خپله کړه.