د چين د کمونېست ګوند له اتلسم ملي کانګرېس راهيسې چين د نړۍ په کچه د فضايي چارو، د مصنوعي سپوږمکيو د مخابراتو او د انسان وړونکو راکټونو توغولو په شمول، زياتو ساحو کې د پام وړ برياليتوبونه تر لاسه کړي دي. دا ټولې لاسته راوړنې له دې امله دي، چې د چين د کمونېست ګوند د مرکزي کمېټې عمومي منشي شي جين پينګ تل د چين د هوانوردۍ او فضانوردۍ چارو ته پاملرنه کړې او د دغو چارو په برخه کې یې نه ستړې کېدونکی کار کړی او لا یې هم کوي. د فضانوردۍ د اتمې ورځې د رارسېدو په وخت کې د فضانوردۍ په چارو کې د شي جين پينګ د پاملرنو په هکله معلومات به په دې متن کې ولولئ.
د ۱۹۷۰ کال د اپرېل په ۲۴مه نېټه په چين کې د دونګ فانګ هونګ لومړي نمبر په نوم، لومړۍ ځمکنۍ مصنوعي سپوږمکۍ په بريالۍ توګه فضا ته وتوغول شوه. په هغه وخت کې دا د چينايانو لپاره ډېر وياړ و. د چينايانو رهبر شي جين پينګ په زړه کې هم د فضانوردۍ په چارو کې ژور خوب لري. له ۴۳کلونو وروسته، شي جين پينګ د چين د فضايي تېکنالوژيو د څېړنې په انسټيټيوټ کې له ټولو کارکوونکو سره د دونګ فانګ هونګ لومړي نمبر سپوږمکۍ د توغولو غورې شېبې يادې کړې، چې د چينايانو د زحمتونو او هڅونې روحيې څرګندوي .
شي جين پينګ د ۲۰۲۰م کال په اپرېل کې د دونګ فانګ هونګ لومړي نمبر سپوږمکۍ د توغولو په دندې کې برخه والو زړو ساينس پوهانو ته يو ځوابي پيغام لېږلی او په ترڅ کې يې په نوې زمانه کې د فضايي چارو کارکوونکو ته نېکې او صمیمې هيلې وړاندې کړې، چې په هر شرط بايد په خپله د هڅولو او زيار ايستلو ټينګ هوډ وساتي، د فضايي چارو له پخوانيو ساينس پوهانو څخه زده وکړي، هر ډول ستونزو ته ماتې ورکړي، په زړه ورتوب سره د فضانوردۍ ساينس او تېکنالوژۍ پیاوړې کړي، تر څو چينايان په فضايي چارو کې لا ثابت او زيات برياليتوبونه تر لاسه کړي او چين په دې ساحه کې غښتلی هېواد وګرځي.
د سپوږمکۍ اکتشافي پروژې په ټوله نړۍ کې د ساينس او تېکنالوژۍ په ساحه کې مخکښې دي. په چين کې د سپوږمکۍ اکتشافي پروژو په بهير کې ساينس پوهان له ډېرو ستونزو سره مخ شوي، خو ګڼ شمېر لاسته راوړنې یې هم درلودلي دي. د چانګ عه لومړۍ نمبر سپوږمکۍ سپوږمۍ ته توغول شوې او د چانګ عه پنځم نمبر راستنېدونکې دستګاه په سپوږمۍ کې د اخيستل شويو ځمکو نمونو په اخیستلو سره بېرته ځمکې ته ښکته شوې ده.
شي جين پينګ وويل، چې د سوسياليزم د عصري کېدو له لارې د پياوړي هېواد د ابادۍ او د چيني ملت د بيا سمسورتيا رامنځته کېدل باید د هر چينايي په زړه کې کې یو ارمان وي، هلې ځلې ورته وکړي او نسل په نسل د دوامدارو هڅو په ترڅ کې برياليتوبونه تر لاسه کړي. شي جين پينګ د سپوږمکۍ اکتشافي پروژې د چانګ عه د څلورم نمبر سپوږمکۍ توغولو په دنده کې له استازو سره د ليدنې په وخت کې وويل، چې موږ بايد د نړۍ د ساينس او تېکنالوژيو د پرمختګ تمايل ونيسو، علمي روحيې ټينګې کړو، ستراتيژيو، بنسټيزو او پرمختللو ساحو ته پاملرنه وکړو، نيمګړتياوې له منځه یوسو، د پرمختګ تمايل لپاره مخکې له مخکې تنظيمات ولرو ، کليدي او مرکزي تېکنالوژۍ پیاوړې کړو، د هېواد د نوښت سيستم عمومي اغېزه لوړه کړو، په پر له پسي ډول د ساينس او تېکنالوژۍ او د نوښت توان غښتلی کړو او د نړۍ په لوړو تېکنالوژيو کې مهم مقام ونيسو.
د فضا لټول د ټولو انسانانو ګډ خوب دی. شي جين پينګ څو څو ځلې په اشارې سره ويلي، چې چين تل په معقوله توګه د فضا سرچينې د لټولو او استفاده کولو، د فضايي چاپېريال د ساتلو دريځ غوره کوي او د فضايي چارو هڅونه کوي، چې ټولو انسانانو ته ګټې ورسوي. هغه د چانګ عه د څلورم نمبر سپوږمکۍ توغولو په دنده کې له استازو سره د ليدنې په ترڅ کې د فضانوردۍ چارو د ساينس پوهانو هڅونه کړې، د فضا د سوله ايزې استفادې او د انسانانو د ګډ برخليک ټولنې د جوړولو لپاره د چين ځواک، وړانديز او قوت وړاندې کړی.هغه وويل، چې موږ غواړو له بېلا بېلو هېوادونو سره يو ځای ګډ بحثونه وکړو،ګډې ابادۍ وکړو او لاسته راوړنې ګډې شريکې کړو، د علمي څېړنو لپاره نړيوال تګ راتګ پياوړی کړو، علمي پلان، پروژې او ابادۍ پرمخبوزو، د نوښت توان غښتلی او همکارۍ پراخې کړو، تر څو د انسانانو د علمي چارو د پرمختګ هڅونه وکړو.
د ۲۰۲۳م کال د اپرېل ۲۴مه نېټه به د چين د فضانودرۍ اتمه ورځ وي. په تېر يو کال کې چين د فضانودرۍ په ساحه کې پر له پسې لاسته راوړنې درلودلي، چې په ټول کال کې يې د ۶۴ځلو لپاره د سپوږمکيو او فضايي بېړيو د توغولو دندې تر سره کړې، فضايي سټېشن يې په بشپړه توګه جوړ کړی، د لومړي ځل لپاره يې په سپوږمۍ کې نوې کاني ډبرې پيدا کړې او د لمر د اکتشاف هراړخيزه شبکه يې په ابتدائي ډول جوړه کړې ده. په روان کال کې به په چين کې د سپوږمۍ اکتشافي پروژې څلورمه دوره او د سيارو اکتشافي مهمې پروژې تر سره شي، تر څو د چين فضايي سټېشن د کارولو او پرمختګ پړاو ته ورسېږي.
