ټرمپ د افغانستان په اړه د امريکا له موخو پرده پورته کړه

امريکا عملاً د يوې خطرناکې جګړې پر ډګر د افغانستان د بدلولو اعلان وکړ او په دغه کار سره يې د افغانستان په اړه خپل بد نيت څرګند کړ.

که څه هم چې افغان ولس پر خپل هېواد د امريکا د يرغل له هماغه لومړيو څخه د واشنګټن پر خطرناکو موخو پوهېدو، خو اوس دا موخې تر لمر روښانه شوې.

د امريکا ولسمشر ډونالډ ټرمپ په روان ۲۰۱۹ ز کال کې له خپلې کابينې سره په لومړۍ ناسته کې د افغانستان په اړه حيرانوونکې څرګندونې وکړې او عملاً يې له روسيې، پاکستان او هند څخه وغوښتل چې په افغانستان کې دې جګړه وکړي.

ټرمپ په خپلو خبرو کې پر افغانستان د پخواني شوروي يرغل هم په حقه وباله او ويې ويل چې شوروي ته (ترهګر) ورتلل، نو روسيې حق درلود چې پر افغانستان يرغل وکړي.

د افغانستان په اړه د ټرمپ  وروستۍ څرګندونې له څو اړخونو څخه د غور او تامل وړ دي.

که څه هم امريکا پخوا د افغانستان د خپلواکۍ خيال نه دی ساتلی، خو ټرمپ په دې خبرې سره  يوځل بيا په ښکاره د ټولو نړيوالو اصولو خلاف، د افغانستان په چارو کې مداخله وکړه.

ټرمپ په داسې حال کې پر افغانستان د روسيې يرغل په حقه ګڼي، چې په ۱۳۵۷ لمریز کال کې د پخواني شوروي له ملاتړه برخمنو کمونيستانو په افغانستان کې د قانوني نظام پرخلاف خونړۍ کودتا وکړه. د وخت ولسمشر يې د خپلې کورنۍ له ۳۰ غړو سره وواژه او بالاخره پر افغانستان پخواني شوروي همداسې خونړی يرغل وکړ، لکه  په ۲۰۰۱ ز کال کې چې امريکا وکړ او هماغه د کمونيستانو کودتا د شوروي د تېري او تر ننه د افغانستان د ټولو بدمرغيو او ستونزو پيلامه شوه.

په داسې حال کې چې د ۱۳۵۷ لمریز کال د غويي د ۷مې له کودتا مخکې، په افغانستان کې يو مرکزي حکومت و او له افغانستانه هېڅ هېواد ته ګواښ نه و.

بل دا چې ټرمپ په ښکاره توګه وويل چې اوس د دې وخت دی چې روسيه، هند او پاکستان په افغانستان کې جګړه وکړي.

ټرمپ په دغه کار سره د افغانستان په اړه د امريکا بد نيت په ډاګه کړ او دا يې وښوده چې امريکا ته د افغانستان د خلکو ژوند او د دغه هېواد برخليک هېڅ ارزښت نه لري او که د امريکا ګټې يې ايجاب کړې، نو دوی حاضر دي چې د افغانستان د برخليک په اړه له نورو هېوادونو سره معامله وکړي.

دې ته په پام سره چې پاکستان او هند په خپل منځ کې پخوانۍ دښمنۍ لري او دغه راز پاکستان له افغانستان سره هم تل د دښمن په شان عمل کړی او څومره يې چې وس شوی افغانستان يې د بدمرغيو او ستونزو ډنډ ته ور ټېل وهلی او همدارنګه روسيه چې د پخواني شوروي اتحاد ميراث خوره ده، هغه شوروي چې پر افغانستان د دوی د تېري ټپونه لا جوړ شوي نه دي، بلکې هماغه ټپونه په ناسور بدل شوي او افغانان ترې کړېږي، نو افغانستان ته يې بيا رابلل په څه معنا دي؟

د دې معنا دا ده چې امريکا غواړي افغانستان د سوريې په برخليک اخته کړي، داسې چې يوه سيمه به روسيه بمباروي، بله به هند، بله پاکستان، بله امريکا او ښايي ايران او نور هېوادونه هم ور ګډ شي چې دا د جګړه ځپلي، ټپي او په ستونزو کې ښکېل افغانستان لپاره د زهرو غوړپ دی، چې که تر ستوني يې تېر شو، نو د تل لپاره به بيا سر پورته نه کړي.

امريکا په ۲۰۰۱ ز کال کې د ترهګرۍ او نشه يي توکو له منځه وړلو، د ښځو له حقونو څخه د دفاع او له داسې نورو پلمو او شعارونو سره پر افغانستان تېری وکړ، خو له هماغه پيل څخه تر نن پورې يې دلته داسې وحشتونه ترسر کړل چې با عزته انسان يې په يادولو شرمېږي.

په هوايي او ځمکنيو بريدونو کې يې بې شمېره ښځې، ماشومان، ځوانان او سپين ږيري ووژل، بې عزته يې کړل، زندانونه يې ور باندې ډک کړل او دغه لړۍ لا هم دوام لري.

ټرمپ  د امريکا کابينې ته په خپلو څرګندونو کې اعتراف وکړ چې په افغان جګړه کې ښکېلو جنرالانو چې څومره پيسې ترې غوښتې، ور يې کړې، څو طالبان او داعش د يو او بل پرضد وجنګېږي.

د ټرمپ دې خبرې هغه حقيقت په ډاګه کړ چې افغان ولس لا ډېر پخوا چيغې وهلې چې امريکا په افغانستان کې د جګړې د دوام لامل ده او همدا امريکايان غواړي چې د افغانستان پر سر له نورو هېوادونو سره معامله وکړي.

ټرمپ يو عادي امريکايی نه دی چې خبرې يې يو ساده او شخصي تحليل وګڼل شي، بلکې د دغه هېواد ولسمشر دی او د ده خبرې د امريکا د رسمي دريځ استازيتوب کوي او کټ مټ هغه حقيقت دی چې امريکا يې غواړي.

ټرمپ خو اوس يوازې دا خبره کړې چې امريکايي جنرالانو ته يې د داعش او طالب ترمنځ د جګړې لپاره پيسې ورکړې، خو حقيقت دا دی چې امريکا د ټولو افغانانو ترمنځ جګړه غواړي او دا خبره په تېرو شاوخوا اتلسو کلونو کې هر افغان ته ثابته شوې چې دوی پر افغانستان د تېري له هماغه پيل څخه د حکومت په څنګ کې ځينې پخواني قوماندانان، واليان او بدماشان استخدام کړل او د خپلو عسکرو په شان يې ترې استفاده وکړه او لا يې هم کوي.

دوی ان د دې خيال هم ونه کړ چې دغه کسان به بالاخره مرکزي دولت ته په سرخوږي بدل شي او د کابو کولو توان به يې نه لري.

څو ورځې وړاندې بې بي سي د نيويارک ټايمز ورځپاڼې په حواله ليکلي وو چې د امريکا استخباراتي ادارې (CIA) په افغانستان کې داسې کسان استخدام کړي چې د افغان پوځ او پوليسو په پرتله درې چنده تنخوا ورکوي او دغه ځواکونه د چاپو پرمهال د ملکي خلکو د مرګ ژوبلې خيال نه ساتي.

د بي بي سي په دغه راپور کې ویل شوي چې دامريکا د استخباراتي ادارې ملاتړي ځواکونه  ولسي افغانان وژني او ربړوي يې.

اوس د امريکايي موخو په لا بربنډېدو سره افغانانو ته پکار ده چې نور دې د خپل هېواد د برخليک په اړه فکر وکړي او د خدای( ج) په خاطر دې د دغه مظلوم ولس پر حال رحم وکړي او په خپلو کې دې سره کېني او امريکا ته دې ځواب ورکړي.

که لا هم د امريکا پر نيت نه پوهېږو او لا هم په دې تمه وو چې پردي به مو وژغوري، نو هېواد به له ډېر خطرناک برخليک سره مخ شي چې بيا به يې ژغورل د ډېرو افغانانو ژوند واخلي او ان ښايي په هره بيه يې ونه شو ژغورلای.

نور بايد په دې پوه شو چې هېڅوک زموږ له غمه نه دي مړه او که د دوی ګټې يې ايجاب کړي، نو په ډېره ناڅيزه بيه به مو وپلوري.

له دغه ناورين څخه د ژغورنې يوازينۍ لار د افغانانو يووالی او با عزته سوله او ټولو پرديو ته ځواب او له هېواد څخه ايستل دي.