ډاکټر عبدالله راتلونکو ټاکنو کې د بانفوذه مرستيال په لټه کې دی

سپيدار ماڼۍ کې سرچينو سپوږمۍ راډيو ته ويلي دي چې اجرايه رييس عبدالله عبدالله هڅه کوي تر څو راتلونکو ولسمشريزو ټاکنو کې ،د تير وار په پرتله دا ځل خپله لومړۍ مرستيالي يوه پياوړي او بانفوذه پښتون سياستوال ته ورکړي تر څو ټاکنې په آسانۍ وګټي . سرچينه وايي عبدالله عبدالله تمه لري چې خپله لومړۍ مرستيالي دا وار د پارلماني چارو وزير ډاکټر فاروق وردګ ته ورکړي او په دې تړاو يې د خپلو نيږدې پلويانو ملاتړ هم تر لاسه کړی دی، دغه راز به عبدالله عبدالله د امريکې له سفر وروسته له حکمتيار سره وګوري تر څو ښاغلی وردګ ديته راضي کړي چې لومړی معاونيت ورسره ومني.
سرچينه وايي که چيرې عبدالله په لومړني دغه انتخاب کې بريالی نه شي نو هڅه به وکړي چې د بهرنيو چارو وزارت سياسي مرستيال حکمت خليل کرزی اړ کړي تر څو له نوموړي سره د ولسمشرۍ ټاکنو کې لومړۍ مرستيالي قبوله کړي.
ټاکنو کميسيون د راتلونکو ولسمشريزو ټاکنو ورځ د ۱۳۹۸ د حمل ۳۱ نيټه اعلان کړې ده او سر له اوسه د مطرحو سياستوالو تر منځ د انتخاباتي ډلو او ګروپونو په جوړولو کار پيل شوی دی.