افغانستان یو ځل بیا د خبریالانو لپاره خطرناک هېواد بلل شوی

افغانستان یو ځل بیا د خبریالانو لپاره د خطرناکو هیوادونو په سر کې ځای نیولی دی .د افغان خبریالانو د خوندیتوب کمېټه وايي، چې په ۲۰۱۸ کال کې یې په افغانستان کې د خبریالانو او رسنیزو کارکونکو سره د تاوتریخوالي ۱۲۱ پیښې ثبت کړې دي. د دغه بنسټ مشر نجیب شریفي زیاته کړه، په دغه کال کې په مجموعي ډول ۱۷ خبریالان او د رسنیو کارکوونکي وژل شوي دي. هغه وویل، چې په دغو قضیو کې د خبریالانو د وژنې، ټپي کیدو، لنډ مهال بند، تښتونې او د تاوتریخوالي یو شمیر نورې پېښې شاملې دي. د دغې کمیټې راپور ښیي، چې په یادو قضیو کې ۱۵ ښځینه خبریالانې هم شاملې دي، چې د دندې پر مهال له بیلابیل ډوله تاوتریخوالي سره مخامخ شوي دي. خو د خبریالانو د خوندیتوت کمیټې رییس وویل، چې د ۲۰۱۷ کال په پرتله په تیر عیسوي کال کې د افغان خبریالانو د قتل په پیښو کې کموالی راغلی دی.