اتمر: د ټاکنو کمیسیون په چارو کې د ارګ مداخله به حالت لا پېچلی کړي

د ملي امنیت پخوانی سلاکار او راتلونکو ولسمشرۍ ټاکنو ته احتمالي نوماند محمد حنیف اتمر وایي، د ارګ له خوا د ټاکنو پر کمیسیون هر ډول فشار نه یوازې د دغه کمیسیون فعالیتونه اغېزمن او له ځنډ سره مخ کوي، بلکې په جدي توګه د ولسمشرۍ ریاست د راروانو ټاکنو روڼتیا تر پوښتنې لاندې راولي. د اتمر د مطبوعاتي دفتر د فیسبوک پاڼې له مخې، ارګ په دې ورستیو کې د نا معلومو سیاسي دلایلو له مخې د ټاکنو د کمیسیون په چارواکو فشار راوړې دی چې د ولسمشرۍ ټاکنو د نوماندانو د نوم لیکنې د بهیر موده وغځوي. په ملي او دموکراتیکو بهیرونو په ځانګړي ډول د ټاکنو پر بهیر باندې د خلکو اعتماد او باور یو اصل دی، خو په دغه بهیر کې د حکومت لاسوهنه د دغه دموکراتیک بهیر په اړه د خلکو باور کمزوری او کمرنګه کوي. سرچینه کاږي، د دوی په باور د ټاکنو د خپلواک کمیسیون په کار کې د حکومت پر له پسې لاسوهنې به حالت لا پیچلی کړي او دوی دا کار د انتخاباتو مهندسي بولي چې باید ترې ډډه وشي.