د کابل ولایت د ولسي جرګې ځینې معترض نوماندان وايي، په کابل کې دې د تېرو ټاکنو لومړنۍ پایلې باطلې اعلان شي او دغه ټاکنې دې له سره وشي.
پرون په کابل ښار کې ځینو معترضو نوماندانو د ټاکنو کمېسیون له لوري د پایلو پر اعلان نیوکې وکړې او هغه یې د نه منلو وړ وبللې. د معترضو نوماندانو په خبره، په دغو ټاکنو کې پراخه درغلي شوې ده او د دې اړتیا ده چې د خلکو حقوقو ته درناوی وشي. دوی پرون د شکایتونو کمېسیون مخې ته لاریون کړی و او له دغه کمېسیون یې وغوښتل چې له خپلې مخکینۍ پرېکړې دفاع وکړي او په کابل کې د ولسي جرګې تېرې ټاکنې او پایلې یې باطلې اعلان کړي.
د معترضو نوماندانو له ډلې ځینې یې پر دې باور دي چې د ولسي جرګې په تېرو ټاکنو کې شتمن خلک بریالي شوي او رایې په پیسو اخیستل شوې دي. د دوی په خبره، د ټاکنو خپلواک کمېسیون په دغو درغلیو او فساد کې ښکېل و او د خلکو حقوق یې تر پښو لاندې کړي دي. معترض نوماندان ادعا کوي چې دوی د رایو د پلور په اړه کره سندونه لري او داسې ثبوتونه ورسره شته چې ښيي، د ټاکنو خپلواک کمېسیون کمېشنران په فساد کې ښکېل دي.
دوی همدا راز خبرداری ورکړی چې که د کابل ولایت د ولسي جرګې لومړنۍ پایلې باطلې اعلان نه شي، نو له ولسمشریزو ټاکنو سره به پرېکون وکړي. بل پلو د ټاکنو خپلواک کمېسیون بیا وایي چې اعلان شوې پایلې نهایي نه دي او معترض نوماندان کولی شي د ټاکنیزو شکایتونو خپلواک کمېسیون کې خپل شکایتونه ثبت کړي. د دغه کمېسیون په خبره، د شکایتونو تر څېړلو وروسته به نهايي پایلې اعلان کړي.
یو تن معترض نوماند عرفانالله عرفان وايي، د ټاکنو خپلواک کمېسیون پایلې له پراخو درغلیو او ستونزو ډکې دي او باید د خلکو حقوقو ته د درناوي په موخه د کابل ټاکنې بیا ځلې ترسره شي. نوموړي ویلي: «د ټاکنو خپلواک کمېسیون کمېشنران په فساد کې ښکېل دي. د کابل حوزې د ولسي جرګې په ټاکنو کې پراخ فساد شوی دی، نو د ټاکنیزو شکایتونو خپلواک کمېسیون باید پر خپله پرېکړه ودرېږي او د کابل ولایت لومړنۍ پایلې باطلې اعلان کړي.»
معترض نوماندانو همدا راز ادعا کړې چې له کابله بریالي شوي نوماندان د پیسو په مقابل کې کامیاب شوي او داسې اسناد هم په واک کې لري، چې د ټاکنو کمېسیون کمېشنران هم په پراخ مالي فساد کې ښکېل دي.
بل پلو د ولسي جرګې مشر او ډېرو نورو غړو هم د ولسي جرګې په پرونۍ غونډه کې د خبرو پر مهال د کابل او ولایتونو د ولسي جرګې ټاکنې له درغلیو او فساد ډکې وبللې. د ولسي جرګې رییس عبدالروف ابراهیمی وویل چې ټاکنیز کمېسیونونه باید د خلکو شکایتونو ته غوږ ونیسي، ځکه تېرې ټاکنې له درغلیو ډکې وې او ولس ته باید قناعت ورکړل شي. ابراهیمي ویلي: «تېرې ټاکنې له درغلیو او فساد ډکې وې، د ټاکنو کمېسیون د ټاکنو په مدیریت کې ناکام و، د ټاکنیزو شکایتونو کمېسیون باید اوس د خلکو غږ واوري، شکایتونه په سمه توګه وڅېړي او حق حقدار ته ورسوي».
د ټاکنیزو شکایتونو کمېسیون بیا وایي چې د ټاکنو د پایلو تر اعلان وروسته یې د کابل حوزې د ټاکنو په اړه سلګونه شکایتونه تر لاسه کړي دي. د دغه کمېسیون ویاند علي رضا روحاني وايي، دوی هڅه کوي چې د خلکو او معترضو نوماندانو سلګونه شکایتونه وڅېړي. د ده په خبره، دوی د خلکو حقوقو ته ژمن دي او هڅه کوي چې شکایتونه تر دقیقې څېړنې لاندې ونیسي او وروسته به نهایي پرېکړه کوي.
