جمعیت ، جنبش او وحدت ګوندونو ؛ په رسمي توګه عبدالله د خپل نوماند په توګه معرفي کړ

اسلامي جمعیت ، جنبش او وحدت ګوندونو نن په رسمي توګه عبدالله عبدالله راتلونکو ولسمشریزو ټاکنو ته د خپل نوماند په توګه معرفي کړ. ددغه ګوند مشر صلاح الدین رباني وویل، چې د ګوند رهبرۍ شورا په غوڅ اکثریت عبدالله عبدالله د راتلونکو ولسمشریزو ټاکنو د نوماند په توګه اعلان کړی دی او ملاتړ یې کوي. عبدالله عبدالله هم په همدې مناسبت په جوړه شوې غونډه کې د خبرو پر مهال وویل، چې هغه به په حکومت کې د پراخو اصلاحاتو لپاره کار کوي او د ولسواکۍ له لارې به ځان واک ته رسوي. نوموړي همدا راز وویل، چې اجرایه ریاست به پر خپل ځای وي او ددغه ریاست لپاره به رییس او دوه مرستیالان هم ګومارل کېږي. د عبدالله عبدالله له ټاکنیز ټیم د ولسمشر لومړي مرستیال عبدالرشید دوستم او همدا راز د پخواني ولسمشر حامد کرزي دویم مرستیال کریم خلیلي هم ملاتړ کړی دی. ډاکټر عبدالله عبدالله په خپلو خبرو کې پر وسله والو طالبانو هم غږ وکړ چې د جګړې پر ځای د سولې لار غوره کړي او په ولسواکو بهیرونو کې ونډه واخلي. عبدالله عبدالله وویل، چې دی په هېواد کې د قومي او ژبني تعصب پر وړاندې مبارزه کوي او د دایمي سولې لپاره چې افغانان تلپاتې ثبات ته ورسوي ملاتړی دی.