افغان ۱۹ کلنه لوبډله نن له سویلي افریقا سره لوبه کوي

د افغانستان، هند او سویلي افریقا د ۱۹ کلنو کم عمره کرکټ ملي لوبډلو ترمنځ په درې اړخیزه لوبلړۍ کې نن ورځ دوولس نیمې بجې افغان لوبډله له کوربه سویلي افریقا لوبډلې سره لوبه ترسره کوي. دغه لوبه د دواړو لوبډلو لپاره مهمه ده؛ ځکه چې ګټونکې لوبډله به یې له هندوستان سره د یادې درې اړخیزې لوبلړۍ په پایلوبه کې سیالي ترسره کړي. افغان ۱۹ کلنې لوبډلې په دې لوبلړۍ کې تردې وړاندې د سویلي افریقا لوبډلې ته ماتې ورکړې ده او همدا یوه بریا لري؛ خو هندۍ لوبډلې بیا په خپلو تېرو څلورو لوبو کې هیڅ ماتې نه ده منلي. د یادولو وړ ده، چې د دې درې اړخیزې لوبلړۍ پایلوبه به د روانې جنورۍ میاشتې په ۱۰مه نېټه ترسره شي.