ټرمپ ټینګار کوي چې خپل امریکايي ځواکونه به له افغانستان څخه وباسي. نوموړي ویلي چې دوی هلته پراخ لګښتونه کوي، خو په دغه هېواد کې د جګړې پای لا هم معلوم نه دی. ټرمپ دا څرګندونې په داسې حال کې کړې دي چې د امریکا سنا د پنجشنبې په ورځ له افغانستان او سوریې د امریکایي ځواکونو له وتلو سره مخالفت څرګند کړی او په دې اړه یې یوه لایحه تصویب کړې ده. په دې لایحه کې ویل شوي چې ترهګرې اسلامپالې ډلې لا هم په افغانستان او سوریه کې فعالیت کوي او دا د امریکا پر وړاندې ګواښ دی.
امریکا به د خپلو ګټو پر اساس پرېکړه کوي. د امریکا سنا فکر کوي چې امریکايي ګټې په دې کې دي چې ځواکونه یې په افغانستان کې پاتې شي، خو ټرمپ بیا فکر کوي چې ګټه یې په دې کې ده چې ځواکونه یې له افغانستان څخه ووځي. څه چې روښانه دي، هغه دا دي چې امریکايي ځواکونه به یا اوس او یا وروسته وځي، خو موږ څه کوو او د امریکايي ځواکونو له وتلو وروسته به زموږ حکومت، امنیت او نورې چارې څنګه وي؟
داسې ښکاري چې زموږ حکومت په دې اړه نه کوم پلان لري او نه هم دې داسې لارو چارو د پیدا کولو په لټه کې دی، چې د امریکايي ځواکونو له وتلو وروسته دلته امنیتي ستونزې پیدا نه شي او حکومت دوام وکړي. ولسمشر د دې پر ځای چې د امریکايي ځواکونو له وتلو وروسته افغانستان ته پام وکړي او سر له اوسه هلې ځلې پیل کړې چې ستونزې پیدا نه شي، هڅه کوي چې د امریکايي ځواکونو د وتلو مخه ونیسي. په دې وروستیو کې یې همداسې یوه پټه هڅه رسوا شوه چې ټرمپ ته یې لیک لېږلی و او ترې غوښتي یې وو چې دوی به لګښتونه را کموي، خو امریکايي ځواکونه دې له افغانستان څخه نه وځي. زموږ ولسمشر باید په دې پوه شي چې امریکا د خپلو ګټو پر اساس پرېکړه کوي، نه د ولسمشر غني د لیک او یا هم د افغان حکومت د غوښتنې پر اساس. له همدې امله د دې پر ځای چې یو ناشوني کار ته لاس واچوو او دا د امریکا د پلان او پروګرام د بدلون مخه ونیسي، غوره ده چې خپله پلان او پروګرام ولرو.
د امریکايي ځواکونو وتل به حکومت ته ستونزې جوړې کړي، خو بر عکس حکومت ته ډېر فرصتونه هم ورکوي. حکومت کولی شي چې د بهرنیو ځواکونو له وتلو وروسته په دوو برخو کې ډېر کار وکړي او ډېرې لاسته راوړنې ولري. لومړی دوی د جګړې په کمولو او سوله کې له دې چارې ډېره ګټه اخیستلی شي، ځکه د بهرنیو ځواکونو وتل به له ډېرو د جګړې انګېزه او پلمه واخلي. همداسې د بهرنیو ځواکونو وتل له افغان دولت سره مرسته کوي چې د سیمې له هېوادونو سره خپلې اړیکې لا زیاتې کړي او د هغوی همکاري را جلب کړي. د سیمې ځینې هېوادونه په افغانستان کې د امریکايي ځواکونو په اړه اندېښنې لري او ښايي له همدې امله د افغانستان له حکومت سره مرستې هم نه کوي. که امریکايي ځواکونه نه وي، نو دا د حکومت لپاره یو غوره فرصت دی چې د سیمې له هېوادونو سره اړیکې نږدې کړي او له دې چارې په امنیت، پرمختګ او اقتصادي وده کې ګټه واخلي. همداسې د بهرنیو ځواکونو وتل به ځینې نور فرصتونه هم برابر کړي، خو پکار ده چې حکومت دا فرصتونه درک کړي او ګټه ترې واخلي.
