امریکا ته له ۱۰۰ د کمو افغانانو د ویزې غوښتنې منل شوي دي

د امریکا د مهاجرینو د فدرالي ادارې چارواکي وايي اته ویشت زره (۲۸۰۰۰) افغانانو د بشري دلایلو له امله په امریکا کې د لنډمهالې اوسېدنې ویزو ته غوښتنې سپارلې دي، چې له سلو کمې یې منل شوي دي. په امریکا کې د دغو ویزو د غوښتونکو د کورنیو غړي او خپلوان اود کډوالو د ملاتړ یو شمیر امریکايي ډلې وايي د ویزو د پروسس دغه سست بهیر، د دوی خوندیتوب ګواښوي او د طالبانو تر تسلط لاندې افغانستان کې دوی له نامعلوم برخلیک سره مخامخ کوي. د بشري دلایلو له امله امریکا ته د تګ غوښتونکو افغانانو د ویزو د پروسس کولو په بهیر کې دغه ځنډ په داسې حال کې رامنځته کیږي، چې له اویا زرو ۷۰۰۰۰ زیات افغان کډوال لا دمخه له افغانستان څخه د پوځي‌ تخلیې په پروسه کې بهر لېږدول شویدي. د دغو افغانان ډیر شمیر امریکا ته رسېدلي او د پوځ په اډو کې د امریکا په بیلابیلو برخو کې د میشت کېدو لپاره د لنډ وخت لپاره ساتل کیږي. له دغې شمیرې ۲۰۰۰ زره کسان لاتراوسه هم د امریکا له خاورې بهر دي او د امنیتي سابقې له ارزونې وروسته به امریکا ته ولیږدول شي.