انسټاګرام اعلان کړی چې کارکوونکي یې د هغو اکونټونو پر له منځه وړلو بوخت دي، چې جعلي دي او یا هم له ډېرې مودې را په دېخوا کارول شوي نه دي. اسټاګرام وایي، دا کار یې هغه وخت پیل کړی چې په دې وروستیو کې د انسټاګرام ډېرو مشهورو کارونکو ورته شکایت وکړ، چې د کتونکو شمېر یې په بې ساري ډول د کمېدو په حال کې دی. دغو کسانو ورته ویلي، چې ځینې جعلي اکونټونه چې له غیر مجازو اپلېکېشنونو کار اخلي، د دوی څارونکي یې نیم په نیمه کم کړي دي. انسټاګرام شرکت په یوه ټوېټ کې ویلي چې په ډېرې چټکۍ سره یې د جعلي، مشکوکو او غیر فعال اکونټونو د له منځه وړلو کار پیل کړی دی. دغه کار نه یوازې انسټاګرام پیل کړی، بلکې د ټولنیزو شبکو ډېری شرکتونه اوس هڅه کوي، چې جعلي، مشکوک او غیر فعال اکونټونه لمنځه یوسي، څو په راتلونکو کې د ځینو ورته پېښو مخه ونیسي. تاسو هم که انسټاګرام لری، هڅه مه کوئ چې له غیر مجازو لارو خپل لایکونه او فالورس ډېر کړئ. خپل اکونټ په منظمه توګه وکاروئ، څو یې دغه شرکت د بندولو هڅه ونه کړي.
