ترکیې په تېرو ۶ میاشتو کې زرګونه افغانان بېرته افغانستان ته رالیږلي

د راپورونو له مخې د ا.ا لخوا د کابل تر سقوط وروسته ترکیې شاوخوا ۱۸زره افغانان بېرته افغانستان ته لیږلي دي. د راپور له مخې د ۲۰۲۲ زیږدیز کال راهیسې له پاکستان وروسته ترکیه دویم هېواد و، چې کابل ته یې زیاتې الوتنې په داسې حال کې پیل کړې چې کابل ته نړیوالې الوتنې په ټپه درېدلې وې. سرچینې د کډولۍ نړیوال سازمان او د ترکیې د چارواکو په حواله خبر ورکړی چې له تېرو شپږو میاشتو راهیسې ترکیې په ۷۹ ځانګړو الوتنو کې شاوخوا ۱۸ زره افغانان د کابل نړیوال هوايي ډګر ته رسولي دي. په راپور کې راغلي، چې د ۲۰۲۱ کال د اګست په ۱۵مه د کابل له سقوط وروسته افغانستان تر ټولو بد بشري بحران سره مخامخ شو، او ملګرو ملتونو دې بحران سره د مقابلې لپاره د ۴،۴ میارده ډالرو مرستو غوښتنه کړې وه. په راپور کې راغلي، په افغانستان کې د روان بشري برحان له امله له تېرې اکست میاشتې راهیسې ۸۴۰ زره افغانان له اسنادو پرته له هېواده وتلي دي.