د افغانستان د بیارغونې لپاره د امريکا ځانګړي پلټونکي ويلي، امریکا په لږ وخت کې په افغانستان ډېرې پیسې ولګولې، د دې پیسو لويه برخه په دبۍ کې بانکي حسابونو ته لوېدلې او په بهرنيو هېوادونو کې پرې کورونه اخيستل شوي دي.
د افغانستان د بیارغونې لپاره د امريکا ځانګړي پلټونکي جان سوپکو د کاناډا له ټورنټو سټار ورځپاڼې سره په مرکه کې ویلي، هغه پیسې چې د افغانستان د بیارغونې لپاره ورکړل شوې، لویه برخه يې په دبۍ کې بانکي حسابونو ته لوېدلې، په دُبۍ، د امریکا په ویرجینیا او د کاناډا په وانکوور ښارونو کې پرې کورونه اخيستل شوي دي.
سوپکو ویلي، په افغانستان کې له ترهګرۍ سره د امريکا تر ۱۷ کلنې جګړې وروسته هم دغه هېواد له ستونزو سره مخ دی، د افغان امنیتي ځواکونو وړتيا تر پوښتنې لاندې ده، فساد پر خپل ځای دی او د نشه يي توکو کښت او قاچاق د وسله والو لويه عايداتي سرچينه ده.
نوموړي ویلي، مونږ په افغانستان کې په ډېر کم وخت کې دومره زیاتې پیسې مصرف کړې چې د دې وړوکې هېواد اقتصاد يې ظرفیت نه درلود.
جان سوپکو ویلي چې افغانستان لا هم له ستونزو سره لاس او ګرېوان دی چې د مالي فساد په شمول، په ځینو ستونزو کې يې امريکا هم لاس لري.
د جان سوپکو په مشرۍ د افغانستان د بیارغونې لپاره د امريکا پلټونکې اداره له تېرو ۶ کلونو راهیسې، د هغو پیسو په اړه پلټنه کوي چې د افغانستان په امنیتي، اقتصادي او د بیارغونې په چارو لګېدلې دي.
