په هېواد کې د ټرمپ وروستیو څرګندونو سخت او توند غبرګونونه پارولي دي. له حکومته نیولې تر ولس پورې ټول د ټرمپ په خبرو غوسه دي او هغه د هېواد ملي حاکمیت او غرور ته سپکاوی بولي. دوی له امریکا د خبرو د وضاحت غوښتنه کوي او پر ټرمپ غږ کوي چې د خپلو غیر شعوري او ان وحشتناکو څرګندونو په اړه وضاحت ورکړي.
د امریکا ولسمشر ډونالډ ټرمپ تېره شپه ناوخته د پاکستان له لومړي وزیر عمران خان سره تر لیدنې وروسته خبري کنفرانس درلود. نوموړي په دې کنفرانس کې د ډېرو څرګندونو تر څنګ، د افغانستان په اړه وینا وکړه چې د افغانانو غوسه یې وپاروله. ټرمپ په خپلو خبرو کې وویل چې دی کولی شي افغان جګړه په یوه اونۍ کې ختمه کړي، خو په دې سره به لس میلیونه افغانان هم ووژل شي. د ده په خبره، نه غواړي چې د لسو میلیونو افغانانو په وژلو په اوو ورځو کې افغان جګړه ختمه کړي. یوازې دا نه، ټرمپ دا هم وویل چې که یې د مور بمونو غورځولو ته ادامه ورکړې وای او یا وغواړي دغه ډول بمونه وغورځوي، نو افغانستان به د نړۍ له نقشې ورک کړي.
د نوموړي دغو څرګندونو د افغان سیاسیونو او حکومت توند غبرګون له ځان سره درلود. تر ټولو مخکې په پاکستان کې د هېواد پخواني سفیر عمر زاخېلوال په یوه ټوېټ کې ولیکل، افغانستان ته ډېرې امپراتورۍ او شاهان راغلل چې دا هېواد محوه کړي، خو دوی په ګونډو شول او افغانستان تر دې دمه شته دی. هغه د ملي یووالي پر حکومت هم نیوکه کړې چې د امریکا هېڅ ناروا او ظلم ته یې غبرګون و نه ښود، نو ځکه ټرمپ دومره جرئت پیدا کړ چې د افغانستان د ورکولو خبره کوي.
ولسمشرۍ ماڼۍ هم تېره ورځ پر دې مسئله غبرګون وښود. حکومت وایي، دوی له ډيپلوماټیکو لارو له واشنګټنه غوښتي چې له عمران خان سره په ګډه خبري غونډه کې د ټرمپ د څرګندونو په اړه افغان حکومت ته وضاحت ورکړي. ولسمشرۍ ماڼۍ وایي، افغانستان یو پیاوړی تاریخي او پېژندل شوی هېواد دی او افغانان له زرګونو کلونو راهیسې دلته اوسېږي، نو هېڅوک یې د ورکولو وړتیا نه لري. افغان حکومت وايي، له امریکا سره یې اړیکې په دوه اړخیز درناوي او دوه اړخیزو ګټو ولاړې دي او د دغه هېواد د سولې له هڅو ملاتړ کوي، خو هېڅ وخت به د خپل برخلیک پرېکړه بل چا ته ور نه کړي. ولسمشر ویلي، د نړۍ هېڅ قدرت ته به واک ور نه کړي چې د افغانانو برخلیک وټاکي او دوی ته د ژوند مسیر روښانه کړي.
پخواني ولسمشر حامد کرزي هم د ټرمپ څرګندونې د هېواد برم او تاریخ ته سپکاوی بللې دي. د ده په خبره، د ټرمپ څرګندونې ښيي چې امریکا بشریت او انساني تاریخ ته درناوی نه لري او یوازې خپلې موخې تعقیبوي. پخواني ولسمشر حامد کرزي د ټرمپ څرګندونې غیر عقلاني، غیر مسوولانه او غیر ډيپلوماټیکې بللې دي. د ښاغلي کرزي په خبره، امریکا پر افغان خاوره د مور بم په استعمال دا وښوده چې د افغانستان ملي حاکمیت او ارضي تمامیت ته درناوی نه لري. د نوموړي له مطبوعاتي دفتره په خپره شوې خبر پاڼه کې دا هم ویل شوي چې امریکا پر افغان سوله له پاکستان سره پټه معامله کړې ده، دا معامله افغانانو ته د منلو وړ نه ده او ټول یې باید پر وړاندې متحد وي.
د پخواني ولسمشر امنیتي سلاکار ډاکټر رنګین دادفر سپنتا هم د ټرمپ پر څرګندونو په یوه خبري غونډه کې خبرې کړې دي. نوموړي ويلي، امریکايي عسکر چا افغانستان ته نه دي را غوښتي، نو ژر تر ژره دې له دغه هېواده ووځي. هغه ویلي، هغه سوله د افغانانو لپاره د منلو وړ نه ده چې د پاکستان ګوډاګیان پر افغان خاوره واکمنان کړي.
د ولسمشریزو ټاکنو نوماند حنیف اتمر هم په یو اعلامیه کې د ټرمپ دغه څرګندونې د هېواد هویت او تاریخ ته سپکاوی بللی دی. د دې تر څنګ په رسنیو، خواله رسنیو او ورځپاڼو کې هم د ټرمپ پر څرګندونو توند غبرګونونه څرګند شوي او هغه یې غندلې دي.
