کابل ته د اندونيزيا د علماوو شورا او دولت ګډ راغلي پلاوي، د افغانستان د سولې شورا له غړو سره په کتنه کې د راتلونکو هغو ناستو په اړه خبرې وکړې چې په اندونیزیا کې به جوړې شي.
د سولې عالي شورا وياند سيد احسان طاهري رسنيو ته ويلي چې دغه ١٣ کسيز پلاوى د اندونیزیا هېواد د علماوو شورا د مرستیال په مشرۍ وړمه ورځ کابل ته راغلى.
هغه ويلي چې دغه پلاوي په افغانستان کې د سولې او ثبات د ټینګښت په موخه د افغانستان د سولې عالي شورا له غړو سره وکتل او د راتلونکو ګډو هغو ناستو په اړه يې خبرې وکړې چې په اندونیزیا کې به تر سره شي.
د ده د معلوماتو له مخې، په دغه لیدنه کې د اندونیزیا د علماوو شورا مرستیال ويلي چې دوى له افغانستان سره د سولې په پروسه کې خپلې همکارۍ جاري ساتي او په دې برخه کې به جدي او همغږې کړنې وکړي.
د سولې عالي شورا مرستیال عبدالخبیر اوچقون، په افغانستان کې د سولې او ثبات د ټينګښت په موخه د اندونیزیا له هلو ځلو مننه کړې او زیاته کړې يې ده چې د یاد هېواد د هڅو په پايله کې د سولې په برخه کې پرمختګ راغلی او د سولې د پروسې او مذاکراتو لپاره به مهم او موثر ګامونه واخیستل شي.
په افغانستان کې د سولې او ثبات د ټینګښت په موخه مخکې هم د افغانستان، پاکستان او اندونیزیا دیني علماوو د اندونیزیا هېواد په کوربه توب ګډه ناسته لرله.
