د نړۍ د اوو سترو صنعتي هېوادونو په سرمشریزه کې به د نورو موضوعاتو ترڅنګ، د ايران پر اټومي پروګرام او په کشمير کې پر روانه لانجه هم خبرې وشي.
د نړۍ د اوو سترو صنعتي هېوادونو يا (G-7) د دغې دوې ورځنۍ سرمشريزې کوربه د فرانسې ولسمشر امانویل مکرون دى.
په دې سرمشريزه کې د نړۍ د نورو مشرانو ترڅنګ، د امریکا د متحده ایالتونو ولسمشر ډونالډ ټرمپ او د برېټانیا نوی لومړی وزیر بوریس جانسن هم ګډون کوي.
ولسمشر ټرمپ له واشنګټن څخه یادې سرمشریزې ته د روانېدو پر مهال خبریالانو ته ويلي، چې تمه لري د جي اووه ډلې له غړو سره به یې خبرې ډېرې ګټورې وي.
په دې سرمشريزه کې چې د فرانسې په بياريڅ کې کېږي، د جي اووه د نورو غړو جرمني، کاناډا، اېټالیا او جاپان تر څنګ، د هند لومړی وزیر نرېندرا مودي هم د مېلمه په توګه ګډون وکړي.
ويل شوي چې مودي به د کشمير پر لانجې د بحث لپاره په انفرادي ډول د نړۍ له ځينو مشرانو سره وګوري.
د سرمشريزې په درشل کې د فرانسې ولسمشر ایمانویل مکرون د هند لومړي وزیر نرېندرا مودي ته ویلي، چې پاریس په کشمیر کې روان وضعيت له نږدې څاري.
مکرون دا څرګندونې د تېرې پنجشنبې په ورځ وروسته له هغې کړې، چې له پاریسه بهر یې په شانتیلي سیمه کې له مودي سره ناسته درلوده.
دا په داسې حال کې ده چې د هند تر ولکې لاندې کشمیر کې وروسته له هغې کړکېچ زیات شو، چې نوي ډیلي د اګست په پنځمه له جمو کشمیر څخه د کورواکۍ ځانګړی موقف واخیست او دې سیمې ته یې اضافي امنیتي ځواکونه واستول.
دغه راز به په دې سرمشريزه کې د نورو مهمو نړیوالو مسئلو ترڅنګ، د ايران د اټومي پروګرام لانجمنه موضوع هم مطرح شي.
دا په داسې حال کې ده چې واشنګټن هڅه کوي څو پر اروپايي متحدانو فشار راولي چې د بنديزونو او نورو اقداماتو په مرسته، پر ايران تر ټولو زيات فشار راوستلو کې همکاري وکړي، څو په دې ډول ايران پر خپل لانجمن اټومي پروګرام مذاکرو ته مجبور شي.
بلخوا په فرانسه کې د برېټانيا يوې ډيپلوماټيکې سرچينې رویټرز اژانس ته ويلي چې دوى له ایران سره د ٢٠١٥ ز کال د شوي اټومي تړون سخت ملاتړي دي.
له دغه تړونه د امريکا ولسمشر ډونالډ ټرمپ د ٢٠١٨ ز کال په مې مياشت کې د وتلو اعلان وکړ او ادعا يې کړې چې د تړون شرايط په کافي اندازه سخت نه وو.
دغې سرچينې له رويټرز اژانس سره په خپلو خبرو کې ويلي: «دا ډېره مهمه ده چې ايران اټومي وسلې ترلاسه نه کړي».
