د سپتمبر په ۱۹مه نېټه د فضا په اړه د چین لومړنی د K 8 مستند فلم چې نوم يې له کړکۍ بهر ابي سياره دی او د چين د سي اېم جي له خوا جوړ شوی، په بريتانيا کې د چين په سفارت کې د چين د ولسي جمهوريت د جوړېدو د ۷۶مې کاليزې د نمانځنې په پار د مېلمستيا د يوې ځانګړې برخې په توګه ګډونوالو ته وړاندې شوی دی. د خبر له مخې د بريتانيا د بېلا بېلو ټولنو شخصيتونو، په دې هېواد کې د مختلفو هېوادونو د سفيرانو او ديپلوماتانو او چيني اوسېدونکو په شمول څه باندې څلور سوو تنو پکې ګډون کړی و.
دا په چين کې د K 8 په کيفيت د فضا لومړنی مستند فلم دی چې د ستورمزلو جای جي ګانګ، وانګ ايا پينګ او يي فو پينګ له خوا شوټينګ شوی و او کيسه يې په فضا کې د دوی له شپږ مياشتني سفر سره تړاو لري. دغه فلم له K 8 تکنالوژۍ په استفادې سره د علمي څېړنې او کلتوري احساساتو د پيوستون له لارې نړيوالو ته د چين د فضايي چارو د ليدو وړ لاسته راوړنو په اړه معلومات وړاندې کوي.
په بريتانيا کې د چين د سفارت لنډمهاله شارژدافير وانګ چي په مېلمستيا کې ګډون او وينا وکړه. هغه په خپله وينا کې ويلي چې علمي، تخنيکي او زرغون نوښت د چين د نوی باکيفيته توليدي ځواک په پرمختګ کې لارښوونکی رول لوبولی دی. ده زیاته کړې چې چين د مصنوعي ځيرکتيا او د نوې انرژۍ د موټرو په برخه کې هم مخکښ ځای لري، نو چين له بريتانيا سره د همکارۍ ډېر امکانات لري.
د بريتانيا د ديپلوماتيکو چارو د پرمختګ وزارت د سياسي چارو مرستیالې مالهوترا د بريتانوي حکومت په استازيتوب هم وینا وکړه او پکې يې وويل چې هېواد يې تل له چين سره اړيکو ته په درنه سترګه ګوري او د اقتصاد او سوداګرۍ، علم او تخنيک، ښوونې او کلتور په ډېرو برخو کې له چين سره همکارۍ روښانه راتلونکې لري.
په بهرنيو هېوادونو کې د فضا په اړه د چين له خوا د خپور شوی لومړی مستند فلم په توګه (( له کړکۍ بهر ابي سياره)) د ډېرو کورنيو او بهرنيو ګډونوالو پام راجلب کړی او هم د دواړو هېوادونو د کلتوري ، علمي او تخنيکي تبادلې په برخه کې د پل رول لوبولی دی. په بريتانيا کې د چين سفارت په بهرنيو هېوادونو کې د دې فلم د خپرولو د نمانځنې لپاره هم يو ځانګړی ديوال جوړ کړی چې مېلمنو ورباندې خپل نومونه او د دواړو هېوادونو ترمنځ د علمي، تخنيکي او کلتوري تبادلې د ښې راتلونکې په اړه نيکې هیلې هم ليکلي دي.
ډېرو کورنیو او بهرنيو مېلمنو د دې فلم لوړه ارزونه وکړه. د بريتانيا د ټولنيزو علومو اکاډمۍ اکاډمېشن مارتين البرو ويلي چې دغه مستند فلم د حيرانتيا وړ دی او مونږ د کلتوري، علمي، تخنيکي او فضايي برخو کې دوه اړخيزو همکاريو ته سترګې په لاره يو. هغه پر دې ټينګار کړی چې بريتانيا او چين د نړيوالې سولې د ساتلو او د نړيوال مديريت د پرمخ بېولو په برخه کې مهم مسؤليت لري او دواړه هېوادونه د دوستۍ د لا ټينګېدو او د همکارۍ د لا پیاوړتيا په برخه کې روښانه راتلونکې لري.
د بريتانيا د هوايي روزنې شرکت اجرائيوي مدير ايمو سيد له خبريال سره د مرکې په ترڅ کې دې ته اشاره کړې چې چین په هوايي او فضايي ساحه کې د نړۍ مخکښ ځای لري او د بې پيلوټه الوتکو، په ټيټه هوا کې الوتونکي دستګاه او هوايي ټکسي په شمول صنايعو کې هم مخکښ بلل کيږي، د دې ترڅنګ فضايي تکنالوژۍ هم چټک پرمختګ موندلی دی. هغه همدارنګه دغه مستند فلم له نوښتونو څخه ډک فلم بللی دی.
د بريتانيا اقتصاد پوه دوکتور ساوس سوري په دې اند دی چې چين نه یوازې له حياتي ځواک څخه ډک اقتصاد دی بلکې د هوايی، فضايي او نورو سمسورو چارو کې يې هم په پر له پسې توګه پرمختګ کړی دی. هغه باور وښود چې بريتانيا به خامخا د کلتوري، علمي، تخنيکي، اقتصادي او سوداګريزو چارو کې له چین سره د نظريو تبادلې کې لازياتې لاسته راوړنې ولري.
ياده مېلمستيا په ښه فضا کې تر سره شوه. ګډونوالو د نوي چين د جوړېدو له ۷۶ کلونو راهيسې د دې هېواد د ليدو وړ پرمختګ ستايلی او ویلي يې دي چې غواړي له چين سره د دوستانه تبادلې او همکارۍ د پرمخبېولو او د دواړو هېوادونو د خلکو ترمنځ د دوستۍ د لاټينګېدو لپاره هڅې وکړي.
