په قطر کې د طالبانو او امریکايي استازو ترمنځ خبرې پیل شوې دي. پرون یوازې د پېژندنې غونډه وه چې د قطري چارواکو په کوربه توب شوې وه. د امریکايي پلاوي مشر زلمي خلیلزاد پر ټوېټر لیکلي دي، چې په قطر کې مې د طالبانو د سیاسي دفتر له نوي مشر ملا برادر سره لومړی ځل ولیدل او د غرمې ډوډۍ مې ورسره وخوړه. نوموړي دغه راز لیکلي چې دا ځل د طالبانو له یوه “با اختیاره ” پلاوي سره ګورم او تمه لرم چې د سولې په خبرو کې مهم پرمختګ وشي. طالبانو هم تایید کړې چې ملا برادر په غونډه کې و، خو وايي چې د مذاکراتي ټیم مشري به عباس ستانکزی کوي او له ملا برادر نه به لارښوونې اخلي. تمه ده چې خبرې به نن په رسمي او جدي ډول پیل شي او څلور ورځې به دوام کوي.
دا خبرې ځکه مهمې دي چې له یوه اړخه پر اساسي موضوعاتو پکې بحث کېږي او له بله اړخه دوو تخنیکي کمېټو له وړاندې پر اړوندو موضوعاتو کار کړی دی. له دې امله ښايي خبرې پر اصلي موضوعاتو را وڅرخي چې دا چاره د توافق احتمال زیاتوي. دې غونډې ته هم خلیلزاد له یو مهم او با صلاحیته پلاوي سره ورغلی او هم د پخوا په پرتله د طالبانو مهم او قوي غړي پکې برخه لري، چې خلیلزاد هم ” با اختیاره ” پلاوی ګڼلی دی. د طالبانو مهم مشر ملا غني برادر هم قطر ته ورغلی دی. که څه هم په خبرو کې د هغه ګډون نه دی تایید شوی، خو له شک پرته هغه به خبرې رهبري کوي او تر څارنې لاندې به یې وي. له بله اړخه د طالبانو پر پخوانیو غړو سربېره، نوي کسان هم ورغلي چې د طالبانو د نفوذ لرونکو کورنیو غړي پکې دي. د ملا عمر ورور ملا منان عمري، د مولوي منصور د کورنۍ مهم غړی عبدالطیف منصور او د مولوي یونس خالص د کورنۍ غړی مولوي مطیعالحق هم له مذاکراتي ټیم سره په قطر کې یو ځای شوي دي. دا چاره هم ښيي چې دا خبرې هم د با صلاحیته پلاوو ترمنځ دي او هم مهمې او برخلیک ټاکونکې دي.
دا خبرې له دې اړخه هم مهمې دي چې ښايي داسې ګامونه واخیستل شي چې مخ پر وړاندې تګ اسانه کړي. یا ښايي چې خبرې له داسې ربړې سره مخ شي چې وړاندې تګ ستونزمن او ان ناشونی کړي. که امریکا د ځواکونو وتل ومنل او طالبانو یې د وتلو پر څرنګوالي توافق وښود، نو مانا دا ده چې وړاندې تګ اسانه شوی دی او اساسي ستونزه حل شوې ده، خو که په دې خبره کې اختلاف پاتې شو او دواړه لوري پرې جوړ نه شول، نو د دې مانا دا ده چې وړاندې تګ ستونزمن او ښايي ناشونی وي. دغه راز که امریکا د طالبانو هغه ډاډ او تضمین ومانه چې افغانستان به بیا د امریکا او امریکايي ګټو پر ضد نه کارول کېږي، نو یوه بله لویه غوټه هواره شوې ده، خو که یې ونه منل، مانا یې دا ده چې د جوړجاړي پر وړاندې خنډونه شته چې لرې کول یې ستونزمن دي. راتلونکې څو ورځې به روښانه کړي چې د سولې خبرې د بریا که ناکامۍ لوري ته روانې دي، خو له همدې ځایه او له همدې خبرو بریا یا ناکامي پیلېږي.
