د پاکستان د جمعیت علمای اسلام (س) ګوند او د لویې دیني مدرسې، دارالعلوم حقانیه مشر مولانا سمیع الحق د وژنې په تړاو بېلابېل نظرونه دي. ځینې کسان وايي چې هغه خپله د پاکستاني استخباراتو له خوا وژل شوی، خو ځینې بیا بېل نظر لري. د مولانا زوی حامد الحق وايي، ښايي د مولانا سمیع الحق د وژنې ترشا په پاکستان کې ځینې لاسونه وي، خو د ده په ټکو ددې ترشا هند، امریکا، اسراییل او بهرني لاسونه هم دي چې د بل چا په وسیله یې په پاکستان کې دا کار کړی.
د برید څرنګوالی، وخت، ځای، په پاکستان کې سیاسي بدلونونه او له افغانستان سره ځینې تړلي مسایل داسې دي چې ښکاره کوي د هغه مرګ د هغې لوبې برخه ده چې پاکستان یې له سترګو قدرتونو سره پر مخ وړي. اتیا کلن مولانا سمیع الحق مهمه مذهبي څېره وه چې د افغان جګړې ملاتړ یې کاوه او طالبان یې مجاهدین ګڼل. هغه نه یوازې دا چې په خبرو کې د طالبانو ملاتړ کاوه، بلکې د بشري ځواک او مالي مرستو په برابرولو کې یې هم ورسره مرسته کوله. که څه هم هغه دا کار د مذهبي دلایلو پر اساس توجیه کاوه، خو ویل کېږي چې هغه د پاکستان د پوځ او استخباراتو د پالیسیو له مخې دغه کار کاوه. دا چې د دغه کار انګېزه څه وه، جلا بحث دی، خو د هغو د کارونو ګټه مخامخ د پاکستان پوځ او استخباراتو تر لاسه کوله.
مولانا او ملګرو به یې تل د افغانستان د اشغال خبره کوله، خو په پاکستان کې یې د امریکايي ځواکونو، استخباراتو او د هغوی د سیاسي نفوذ په تړاو څه نه ویل. امریکا د پاکستان له خاورې پر افغانستان یرغل وکړ، د پاکستان پوځ او استخباراتو یې مرسته وکړه، ځمکنۍ لارې یې ورکړې، اډې یې ورکړې، سلګونه او زرګونه افغان، پاکستاني او عرب مسلمانان یې پر امریکا وپلورل، خو مولانا ددې هر څه په اړه غلی پاتې شو او یوازې په افغانستان کې یې د جګړې ملاتړ کاوه. له امریکا سره د افغانستان په اشغال کې د پاکستان له ښکاره مرستې سره سره هغه د پاکستان حکومت نه ملامتاوه او دا یې د مجبوریت پر اساس یو ډول مشروع کار باله. له بله اړخه په پاکستان کې ښکاره د اسلام خلاف قوانین حاکم دي او د پاکستان پوځ زرګونه پښتانه او هغه مجاهدین ووژل چې د پاکستان د پوځ خلاف یې جګړه کوله، خو په دغو ټولو چارو کې مولانا د پاکستان د پوځ او استخباراتو ملاتړ کاوه او په پاکستان کې یې جګړه نامشروع ګڼله.
د پاکستان پوځ او استخباراتو ته له دومره پراخ خدمت سره سره اوس ټول شواهد داسې دي چې ښيي د هغه په وژنه کې خپله پاکستاني استخبارات لاس لري. داسې ښکاري چې مولانا په پاکستان کې د ننه د ځینو مسایلو لپاره قرباني شو. له بله اړخه له امریکا سره په افغانستان کې د پاکستان په نوې معامله کې مولانا کار نه ورکاوه او ښايي ستونزې یې پیدا کړې وی. له همدې امله هغه نور ژوندی نه دی. که په لنډه ووایو مولانا په ژوند هم د پاکستان د پوځ او استخباراتو لپاره وکارول شو او وژنه یې هم د هغوی د ګټو لپاره د هغوی په لاس وشوه.
