د ټاکنو خپلواک کمیسیون ولسمشريزو ټاکنو ته پوره چمتووالی وښود

د ټاکنو کمیسیون وایي، د ولسمشریزو ټاکنو لپاره ټول تیاری نیول شوی دی او هېڅ راز لوی خنډ یې په مخ کې نشته. ددغه کمیسون چارواکو نن یوې خبرې غونډې ته د خپلو تیاریو په اړه معلومات ورکړل او وویل، په تېرو پارلماني ټاکنو کې کمیسیون پراخې تجربې تر لاسه کړې دي او د راتلونکو ولسمشریزو ټاکنو په تر سره کولو کې به له دې تجربو ګټه واخلي. دغه کمیسیون داسې مهال یادې څرګندونې کوي چې پر چارو یې پراخې نیوکې موجودې دي. سیاسي ګوندونه، مدني فعالان او د ټاکنو په برخه کې فعال بنسټونه وايي چې ددغه کمیسیون چارې غیر معیاري وې او په ډېرو برخو کې یې فعالیتونه له ستونزو ډک وو. دوی وایي که ولسمشریزو ټاکنو کې هم ستونزې همداسې پر خپل ځای وي نو ددې تمه نه کېږي چې شفافې او عادلانه ټاکنې دې ترسره شي. یاد کمیسون یو ځل بیا ټینګار وکړ، چې ولسمشریزې ټاکنې به پر خپل وخت تر سره کېږي.