د پکتیکا په برمل او ارګون کې یوشمېر پروژې پلې کېږي

د پکتیکا په برمل او ارګون ولسوالیو کې د نږدې ۲ میلیونه ډالرو په لګښت بېلا بېلې پروژې پلې کېږي. د یاد ولایت رسنیز دفتر مسوولینو ویلي چې یادې پروژې د کرنې اوبو لګولو او مالدارۍ ریاست، د پېښو پروړاندې د مبارزې، صنعت او سوداګرۍ ریاستونو په چوکات کې د اروپایي کمېسیون په مالي ملاتړ د یو میلیون ۵۸۱ زره ۳۰۰ امریکايي ډالرو په لګښت پلې کېږي چې چارې به یې په دوو کلونو کې بشپړې او ګټې اخیستنې ته وسپارل شي. سرچینه زیاتوي چې په یادو پروژو کې ۴۱۵ کورنیو ته د کرنیزو توکو د کڅوړو وېش، ۳۶۰ کورنیو ته د سبو د بڼونو ، ۲۰ کورنیو ته د شنو خونو جوړول، ۲۴۰ کورنیو ته د څارویو د خوراکي توکو، ۲۱۰ کورنیو ته د چرګانو وېش، ۲۱۰ نورو کورنیو ته د وزو وېش، د ۲۵ مټریک ټنو په ظرفیت د سړو خونو جوړول، د طبیعي پېښو له خطر سره مخ سیمو کې د ۱۲ بېلا بېلو پروژو پلې کول او خلکو ته د کارونو برابرول شامل دي.