د چين د واکمن کمونېست ګوند مرکزي کمېټې او دولتي شورا د فبرورۍ په درېيمه د دغه هېواد د کليوالو سیمو د هراړخيزې سمسورتيا او د کرنې او کليوالو سيمو د عصري کولو د چټکولو په اړه ” لومړی نمبر“سند خپور کړ.
د چين مرکزي حکومت هر کال خپل لومړی خپور شوی سند د” لومړی نمبر سند“ په نوم يادوي او دغه سند له مسلسلو ۲۱ کلونو راهیسې هر کال د کرنې، کليوالو سيمو او بزګرانو پر موضوعاتو تمرکز کوي.
چين يو لوی کرنيز هېواد دی او چینايان له پخوا راهيسې کرنيزو چارو ته پاملرنه کوي. د دغه هېواد ٪ ۴۰ نفوس په کرنيزو چارو لګيا دي او مشرتابه د کرنې، کلیوالو سيمو او بزګرانو چارې د هېواد له ثبات، پرمختګ او سمسورتيا سره تړلې بولي.
د چين د مرکزي حکوت په سږني ” لومړي نمبر“ سند کې د دغه هېواد د کلیوالو سيمو د سمسورولو چارو عمومي طریقې بيان شوې او پکې مطرح شوې، چې چين به ”د زرو کليو نمونې او د لس زره کليو مديریت“ پروژې له ښو تجربو څخه ګټې پورته کړي او د کليو له خپلو حالاتو او ځانګړتياوو سره سم به د کلیو د سمسورولو تفصلي تدبيرونه غوره کړي. دغه سند د کلیوالو سيمو سمسورول يو اوږدمهاله کار بللی او له حکومتي کادرونو څخه يې غوښتي، چې د ټاکلې کړنلارې له مخې د دغه کار د ترسره کولو لپاره دوامدارې هڅې وکړي او په کليوالو سيمو کې د تشنابونو د بيارغولو په ګډون پر هغو ستونزو تمرکز وکړي، چې بزګران ورته ډېره اړتيا ګڼي او د دې ستونزې هواري ته ډېره لېوالتيا لري.
د چين د دولت رئيس شي جين پينګ د ۲۰۰۳م کال په جون کې د دغه هېواد د جه جيانګ ولایت د ګوندي منشي په توګه دنده پر غاړه درلوده. نوموړي د دې دندې پر مهال ”د زرو کليو نمونې او د لس زره کليو مديریت“ پروژه طرحه کړه چې په رڼا کې يې د جه جیانګ ولایت په لس زرو کليو کې د کرنيز توليد، د کليوالو د ژوند او ايکولوژۍ چاپيريال ډېر ښه شوی او څه باندې زر کلي پدې برخه کې د نمونې په توګه اباد شوي دي.
د بېجينګ پوهنتون د نویو کلیو د پرمختګ څېړنيز انسټېټیوټ مشر جانګ هونګ یو وویل چې د چين حکومت به په اوس او راتلونکې یوه موده کې په کلیوالو سيمو کې د صنايعو د پرمختګ، د کلیو د ابادۍ او مديريت په ګډون بېلابېلو برخو کې هڅې وکړي.
د نوموړي په وينا، دا چې د چين د مرکزي حکومت په ياد سند کې د کرهنیز تولید او بنستیزو تاسیساتو او عامه خدمتونو د پیاوړتیا لپاره تفصلي لارښوونې ليکل شوې، نو ځکه د کليوالو سيمو هراړخيزو سمسورولو چارې به په لاښه توګه پرمخ يووړل شي.
په سږني لومړي نمبر سند کې یو شمېر مهمې دندې ټاکل شوې، چې په هېواد کې د غلودانو د خوندېتوب تامينول، بېوزلي وضعيت ته د کليوالو د بېرته ګرځولو مخه نیول، د کليوالو سیمو د صنايعو د پرمختګ، د کليو د ابادۍ او مديريت د سويې لوړول او د علمي ټکنالوژيو او اړوندو ميکانيزمونو نوښت پکې شامل دي.
په دغه سند کې د غلودانو د خونديتوب تامينول د لومړۍ دندې په توګه ټاکل شوې او مطرح پکې شوی چې چين به د غلودانو د حاصلاتو زياتولو ته لومړيتوب ورکړي.
په چین کې د کروندو سرچینې کمې دي، د کروندو د مساحت پراخول ډېر ستونزمن کار دی، نو مرکزي حکومت يې هڅه کوي چې د ځمکو او تخمونو کیفيت لوړ کړي، عصري کرنيز وسايل او د غلو دانو د کرکیلۍ غوره طريقې وکاروي، څو د غلودانو د حاصلاتو کچه لوړه شي.
د چين مرکزي حکومت په دغه سند کې موخه ټاکلې، چې په روان کال کې به په هېواد کې د غلودانو محصول له ۶۵۰ ميليونو ټنو څخه زیات شي.
کلیوالي سیمې د بزګرانو کورونه دي. یوازې بزګرانو ته د ژوند او کار ښه چاپیریال برابر شي، هغوی د خوښۍ، نېکمرغۍ او امنیت کافي احساس کولی شي.
چين او افغانستان هم دوستانه ګاونډي هېوادونه او هم ستراتېژيکي همکاران دي. د نظريو د تبادلې، د تجربو د شريکولو او د کرنيزو توليداتو د سوداګرۍ په برخو کې د دواړو هېوادونو ترمنځ ګډې همکارۍ ډېر امکانات لري. ۲۰۲۴م کال د چين ته د خپل اقتصادي او ټولنيز پرمختګ د ۱۴م ملي پلان د تطبيق لپاره او افغانستان ته د اقتصادي بيارغونې لپاره ډېره مهم کال بلل کېږي. هيله ده چې دواړه هېوادونه د ګډ برخليک ټولنې د ابادۍ فکورې په رڼا کې زیاتې ګډې همکارۍ وکړي، څو خپلو خلکو ته ګټې ورسوي.
